Бямба гариг бүрт уул уурхайн ертөнцөд ямар
ямар үйл явдал өрнөснийг 24tsag.mn бид тоймлон хүргэдэг билээ. Энэ долоо хоногт манай улсын
эдийн засгийн чухал нөлөөтэй салбарт ямар ямар онцлууштай үйл явдал, шийдвэр
гарсныг товчлон нийтэллээ.
Худалдаа: Хятадууд манайхаас жил бүр 15 сая тонн нүүрс авна
Хятадын “Чайналко” компаний жилийн дотоод
хэрэгцээний нүүрс 400 сая тонн байдаг ч энэ нь хангалттай хэмжээ биш учир
хэмжээг нь нэмэгдүүлжээ. Ингэхдээ тэд манай улсаас жил бүр 15 сая тонн коксжих
нүүрс худалдан авахаар төлөвлөсөн байна. Энэ нүүрснийхээ 30 хувийг Японы
“Иточу”, “Мицүи”, Солонгосын “Кореа Ресурс” компанид тус тус дамжуулан
борлуулах гэрээтэй. Харин Монголын Тавантолгойгоос коксжих нүүрс импортлах
бөгөөд “Эрдэнэс МГЛ” компанитай урт хугацааны гэрээ байгуулжээ.
Байгуулалт: Уул уурхайн орд бүр дэргэдээ ДЦС-тай болно
Эрчим хүчний хэрэглээ улам ихээр нэмэгдэж байгаа учраас уул уурхайн орд газруудыг түшиглэн дулааны станц байгуулахаар болсон юм. Багануурын уурхайд 300-600 МВт хүчин чадалтай станц барих бол Шивээ-Овоогийн орд газарт 4800 МВт чадалтай станц байгуулна. Оюутолгой, Тавантолгойд тус бүр 300 МВт, Өвөрхангай аймгийн Баянтээгийн уурхайд 40 МВт, Хэнтий аймгийн Чандаганы уурхай болон Цайдам нуурын орд, Бөөрөлжүүтийн орд газарт тус бүр 600 МВт чадалтай станц байгуулахаар төлөвлөжээ. Мөн Адуунчулууны уурхай, Дорнод аймгийн ДЦС-ыг өөрчилж хүчин чадлыг нэмэгдүүлэхээр ТЭЗҮ боловсруулж байгаа аж.
Сэлгээ: АМГ-ын шинэ даргын нэр ерөнхий сайдад хүрлээ
Ашигт малтмалын газрын шинэ даргаар Г.Алтансүхийг нэр дэвшүүллээ. Тэрбээр одоо Тагнуулын ерөнхий газрын дэд даргаар ажиллаж байгаа юм. Мөн Батлан хамгаалах яамны Төрийн нарийн бичгийн даргын албыг түр орлон хашиж байна. Төрийн албаны зөвлөлийн хурлаар 2012 оны дөрөвдүгээр сарын 25-ны өдөр сонгон шалгаруулалт явуулж, Г.Алтансүхийг АМГ-ын шинэ даргад дэвшүүлжээ. Түүний нэрийг Ерөнхий сайдад хүргүүлэх бөгөөд хэрэв зөвшөөрвөл АМГ-ыг тэргүүлэн ажиллах юм.
Үр дүн: Стратегийн салбарт гадаад хөрөнгө оруулалтыг хязгаарлав
Аюулгүй байдал, гадаад бодлогын байнгын хороо хуралдаж Монгол Улсын хууль тогтоомжоор гадаадын хөрөнгө оруулагч нь Монгол Улсын стратегийн ач холбогдол бүхий салбарт үйл ажиллагаа явуулж байгаа компанийн хувьцааг 100 хувь эзэмших, хөрөнгө оруулалт хийхэд ямар нэг хязгаарлалт тавигдаагүй байдлыг өөрчлөх хуулийн төслийг чуулганд шилжүүлэв. Энэ нь “Саутгоби Сандс” компаний худалдаатай холбогдон хуулинд тусч байгаа үр дүн юм. Тиймээс хуулийг өөрчилж гадаадын хөрөнгө оруулалт Монгол улсын үндэсний аюулгүй байдалд харшлахгүй байх, татварт нөлөөлөхгүй байх, монополь тогтоохгүй байх гэх мэт нэлээд хэдэн шалгуурыг хангасан байх учиртай ажээ.
Залруулга: “Эрдэнэс Тавантолгой”-н хувьцааны данс нээлгэх гэж бүү яар
Иргэн бүрт “Эрдэнэс Тавантолгой”-н хувьцааг эзэмшихийн тулд данс нээлгэх шаардлагатай бөгөөд зарим брокерийн компаниуд 5000 төгрөгөөр данс нээж байгаа. Үүний Засгийн газар хууль бус гэж үзсэн. Харин санхүүгийн зохицуулах хорооны дарга Д.Баярсайханы хэлснээр хөрөнгийн зах зээлд оролцох гэж буй хэн ч байсан данс нээлгэх нь гарцаагүй. Гэхдээ дээрх 536 хувьцаа арилжаанд орох болоогүй учраас яарах шаардлагагүй юм байна. Өөрөөр хэлбэл 5000 төгрөгийн асуудал шийдэгдтэл хүлээх хэрэгтэй аж.
