АНУ-ын Төрийн нарийн бичгийн дарга хатагтай Хилари Клинтон ГХ-ны сайд Г.Занданшатарт захидал илгээсэн байна. Хатагтай Х.Клинтон: "Монгол Улс Ардчилсан орнуудын хамтын нийгэмлэгийг амжилттай даргалж байгаад талархаж байна. Танай улсын явуулж буй ажиллагаа олон оронд урам зориг өгч, дэмжлэг туслалцаа болж байна." хэмээн онцлон тэмдэглэжээ.
Тэрбээр Ардчилсан орнуудын хамтын нийгэмлэг нь дэлхий дахинаа ардчиллыг урагшлуулахад чухал үүрэг гүйцэтгэж байгааг онцолж, АНУ нь энэ байгууллагыг амжилттай хөгжүүлэхийн төлөө байж, хамтран ажиллахаа илэрхийлсэн байна. Хатагтай Клинтон АОХН-ийн хүрээнд хийгдэж буй шинэчлэлийн үйл явцыг дүгнэхдээ «АНУ тус байгууллагын үйл ажиллагаа сүүлийн хоёр жилд илт сэргэн мандаж байгааг харахад урамтай байна” гэдгээ илэрхийллээ.
Манай улс АОХН-ийн даргын албыг өнгөрсөн жилээс хашиж байгаа бөгөөд энэ хугацаанд түүний Удирдах зөвлөл, Гүйцэтгэх хороог үүсгэн байгуулж, саявтар Ерөнхий нарийн бичгийн даргыг сонгон томилох ажлыг амжилттай зохион байгууллаа. Эдгээр арга хэмжээ нь дэлхийн 140 шахам ардчилсан орныг эгнээндээ багтаасан энэхүү эвслийг улам бүр институц шинжтэй болгоход дорвитой алхам болж байгаа юм.
