150 хүний аминд хүрсэн Германы онгоцыг санаатайгаар осолдуулсан хэрэгт онгоцонд явсан туслах нисэгч нь 27 настай герман үндэстэн Андриас Лубитз гэх залууг буруутгаж байгаа. Тэгвэл туслах нисэгчийн экс найз бүсгүй түүнийг онгоцны ослыг зохион байгуулах талаар ярьж байсан хэмээн хэвлэлүүдэд мэдээлжээ.

Өөрийнхөө нэрийг Мария гэдгээс өөр мэдээлэл өгөхийг хүсээгүй 26 настай бүсгүй онгоцны үйлчлэгч хийдэг байсан бөгөөд өнгөрсөн жил Лубитзтэй хамт таван сарын турш нислэгт гарч байжээ. Тэрээр ослын тухай мэдээллийг сонсоод ихэд балмагдсан бөгөөд экс найз залуу нь уг хэргийн талаар ярьж байсныг санасан гэжээ.

Мария Германы “Bild” сонинд ярихдаа “Лубитз би бүх системийг өөрчлөх ямар нэгэн зүйл хийхээр төлөвлөсөн. Ингэснээр хүн бүр миний нэрийг мэддэг болно хэмээн ярьсан” гэжээ. Энэ нь онгоцны ослыг төлөвлөж байсан тухайгаа хэлсэн хэрэг хэмээн сэжиг төрүүлж буйг үйлчлэгч бүсгүй ярьсан байна.

Онгоцны бүхээгний дуу хураагчаас олдсон мэдээлэлд үндэслэн түүнийг уг ослыг санаатайгаар зохион байгуулсан хэмээн үзэж байгаа юм. Гэвч холбогдох албаныхан Андриа Лубитзийн гэрийг нэгжээд осолтой хамааралтай ямар ч нотолгоо олоогүй. Харин сэтгэцийн эмчилгээнд хэрэглэдэг эм их хэмжээгээр олсон юм.

Андриас Лубитз биеийн эрүүл мэндийн ямар ч асуудалгүй нь ажилд орох болон нислэгийн өмнө авсан шижилгээнүүдээр тогтоогдож байгаа юм. Гэвч компани түүнээс сэтгэцийн шинжилгээ авч байгаагүй аж.

Онгоцонд нислэгийн багийн зургаан гишүүнээс гадна 144 зорчигч явсан бөгөөд тэдний 72 нь Германы, 51 нь Испанийн иргэд байсныг оролцуулахад нийт 18 орны иргэд осолдсон юм. Хэрэглэгчдэд илүү хямд үнээр үйлчилдэг “Germanwings” компанийг аюулгүй байдлаараа тэргүүлдэг Германы томоохон авиа компани “Lufthansa” эзэмшдэг юм.

Д.Үжин