Холливудын алдарт жүжигчин Жонни Депп “Карибын тэнгисийн дээрэмчин” киноныхоо дараагийн ангийг хийхээр Австрали улсад зураг авалтанд орж байгаа. Тэрээр удаан хугацаанд явагдах зураг авалтанд ирэхдээ нохдоо дагуулж ирсэн байна. Харин Австралийн Хөдөө аж ахуйн сайд Барнаби Жойс жүжигчний нохдыг нойрсуулна хэмээн сануулсан нь олон нийтийн сүлжээнд ихээхэн маргаан дэгдээсэн байна.

Жонни Депп уг кинонд тоглуулахаар Йоркшир терьер үүлдрийн Бу, Пистол хэмээх нэртэй хоёр нохойгоо хувийнхаа онгоцоор өнгөрсөн дөрөвдүгээр сарын сүүлчээр Австралид зөвшөөрөлгүй авчирсан аж. Тэрбээр Австралид ирсэн даруйдаа нохдынхоо талаар орон нутгийн засаг захиргаанд мэдэгдээгүйгээс ийм асуудал үүсчээ. Учир нь тус улсын хуулинд зааснаар тухайн амьтныг малын эмчийн үзлэгт хамруулсан байх ёстой аж.

Энэ талаар Австралийн Хөдөө аж ахуйн сайд Жойс хэлэхдээ “Амьтныг хилээр нэвтрүүлэх тусгай хууль дүрэм байдаг. Хэрэв манай хуулийг дэлхийн хамгийн алдартай жүжигчин ийн зөрчвөл бусад нь ч ингэнэ. Тиймээс Ж.Деппийн Бу, Пистоль хэмээх хоёр нохойг АНУ руу буцаах хэрэгтэй. Жүжигчин тэднийг авчирсан онгоцоороо Калифорни руу 50 цагийн дотор буцаах ёстой. Эс тэгвээс бид нохдыг нойрсуулах болно” хэмээн заналхийлсэн аж.

Онгон байгалиараа алдартай Австрали улсад амьтныг зөөх, тээвэрлэхтэй холбоотой хатуу хууль дүрэм үйлчилдэг байна.

“Карибын тэнгисийн дээрэмчин” киноны 5 дугаар анги 2017 оны долдугаар сард дэлгэцнээ гаргахаар төлөвлөгдөж байна. 250 сая ам.долларын төсөвтэй зураг авалт Австралийн амралт жуулчны “Голд-Кост Хеленсвейд хотод явагдаж байгаа аж.