Хятадын Гуанши мужийн өмнөд хэсгийн уулын бэлд төрөөд удаагүй нярай хүүг амьдаар нь оршуулсан байжээ. Гэвч төрөөд сар ч болоогүй хүү асар их хувь тавилангаар амьд гарсан тухай “Cяньхуа” агентлаг мэдээллээ.  

БНХАУ-ын Олон нийтийн хэвлэл аврагдсан хүүг эзгүй тал газарт арав орчим хоног байсан хэмээн мэдээлж байгаа ч нарийн тодорхой мэдээлэл өгөхөөс татгалзжээ. “Сяньхуа” агентлагт цагдаагийн газрын мэдээлснээр хүү төрөлхийн хагархай уруултай төрсөн тул эцэг эх нь голж, түүнийг хаяхаар шийдсэн байна.

Хүү өнгөрсөн дөрөвдүгээр сарын 20-ны өдөр мэндэлсэн бөгөөд дөрөв хоногийн дараа эмнэлгээс гарсан хэмээн тэмдэглэгдсэн байжээ.

Эцэг эх нь хүүг хаях магадлалтай байсан тухай эмнэлгийн цагдаа нарт батлан мэдээлжээ. Эмнэлгийн удирдлага “Жирийн эцэг эхчүүд хүүхдийнхээ төрсний гэрчилгээ, эрүүл мэндийн даатгалын дэвтрийг аваад гардаг. Гэтэл тэр хос хүүхэддээ эдгээр баримтуудыг авахыг хүсээгүй бөгөөд төлбөрөө бэлнээр төлчихөөд л яваад өгсөн” хэмээн мэдэгджээ.

Нярайг хөнөөхийг завдсан хэргээр 5 хүнийг баривчилсан байна. Хүүгийн эцэг эх, 2 эмээгээс гадна хөндлөнгийн хүн буюу хөлсний алуурчин сэжигтнүүдийн тоонд багтжээ. Учир нь эмээ нь бие эрхтний гажигтай нярай хүүгээсээ салахын тулд эрэгтэйг 290 доллараар хөлсөлсөн байжээ.

Хөлсний хүн хүүг цаасан хайрцагт хийгээд эзэнгүй талд хаяжээ. Тэрээр хоёр хоногийн дараа ирэхдээ хүүг амьсгал хураасан хэмээн бодоод хайрцагтай нь хамт гүехэн нүхэнд булсан байна.

Аймшигт хэрэг болсноос хойш хэд хоногийн дараа талд ургамал түүж явсан эмэгтэй хүүхдийн орилох сулхан дууг сонсож, нутгийн хүмүүстэй хамт хайсны эцэст нярайг газар доороос гаргажээ. Хүүг шууд эмнэлэгт хүргэсэн бөгөөд эхэн үедээ биеийн байдал нь маш муу байж байгаад сэргэсэн гэв.

3.5 кг жинтэй төрсөн хүү эмнэлэгт хүргэгдэхдээ 2.6 кг болтлоо турсан байжээ.

Хүүгийн эцэг эх батлан даалтаар суллагдаад байгаа бөгөөд түүнийг гэмтээхгүй хэмээн амласан захидал бичиж, цагдаа нараас уучлал гуйсан тухай “Сяньхуа” агентлаг мэдээлжээ.

Г.Үжин