Засгийн газрын цэргүүд байршлаа орхиж зугтаасны дараа Исламын улс бүлэглэлийнхэн Иракын Рамади хотыг эзэлсэн байна.

Өнгөрсөн долоо хоногт Иракын цагдаа, армийнхнаас бүрдсэн баг исламын хэт даврагчидтай олон өдрийн турш ширүүн тулаан хийсэн ч ялагдал хүлээн байраа орхижээ.

Рамади бол Иракын хамгийн том муж Анбарын нийслэл хот бөгөөд Багдадаас баруун зүгт 112 км-т оршдог төв бүс юм.

Исламын улсынхан манай дайчид Рамади хотыг бүхэлд нь цэвэрлэсэн хэмээн мэдээлсэн юм. Одоогийн байдлаар Иракын эрх баригчид ямар нэгэн мэдээлэл хийгээгүй байгаа ч доод албаныхан ялагдал хүлээсэн гэцгээж байна. Харин АНУ-ын Засгийн газар ялагдал хүлээсэн гэдэг дүгнэлт хийхэд эрт байна гэж мэдээлжээ.

Засгийн газрын цэргүүд зэр зэвсэг, хүн хүч дутуу байсны улмаас ялагдал хүлээсэн хэмээн үзэж байна.

Рамади хотыг эзлэх тулааны үеэр өмнөд хэсгийн Малааб дүүрэгт дөрвөн том дэлбэрэлт болж олон арван хүний аминд хүрчээ. Албаныхны мэдээлж буйгаар сүүлийн хоёр өдрийн тулаанд л гэхэд 500 гаруй хүн амиа алджээ.

Г.Үжин