УИХ-ын гишүүн Х.Баттулга “Монголын үнэн” сониноос 100 сая төгрөг нэхэмжилж, Сүхбаатар дүүргийн шүүхэд нэхэмжлэл гаргажээ.
    УИХ-ын гишүүн Х.Баттулга “Монголын үнэн” сониноос 100 сая төгрөг нэхэмжилж, Сүхбаатар дүүргийн шүүхэд нэхэмжлэл гаргажээ. Учир нь тэрээр тус сонины дөрөвдүгээр сарын 25-ны дугаарт гарсан “Х.Баттулга: Н.Энхбаярын араас бусдыг нь явуулаач” гарчигтай нийтлэлийг гүжир гүтгэлгийн нийтлэл бичиж, олон нийтэд тараан нэр төр, алдар хүндэд халдсан хэмээн үзсэн байна. Иймд тус сониныг уучлалт гуйж, өөрийн сонин болон бусад хэвлэл мэдээллийн хэрэгслээр залруулга гаргах, гэм хорын хохирлын нөхөн төлбөрт 100 сая төгрөг төлүүлэхээр нэхэмжлэл гаргасан аж.
    Харин түүний эл үйлдэлд “Монголын үнэн” сонин “Х.Баттулга гишүүн өөрийнхөө хэлсэнийг үгүйсгэж, шүүх хуулийн байгууллагаар далайлгаснаараа хэвлэн нийтлэх эрх чөлөөнд бүдүүлгээр халдлаа хэмээн байр сууриа илэрхийлжээ. Ингээд “Монголын үнэн” сонины дөрөвдүгээр сарын 25-ны гарсан “Х.Баттулга. Н.Энхбаярын араас бусдыг нь явуулаач” хэмээх нийтлэлийг бүрэн эхээр нь нийтэлж байна.


    “Женко” Х.Баттулга нам дээрээ “Н.Энхбаярын араас бусдыг нь явуулаач. Н.Энхбаяр шиг араас нь бүгдийг явуулаач...” хэмээн хашхирч байна. Тэр маш чангаар дахин дахин ингэж хашхирчээ. Н.Алтанхуяг чихгүй юм чиг бөөвийн сууна. Бүр таг дуугүй... Н.Алтанхуягийн талынхан “... араас нь явуулах бүгдийн тоонд бид ч байгаа даа...” хэмээн харцаа унжуулжээ.
Харин Х.Баттулгын талынхан “...араас нь явуулах бүгдийн тоонд “Алтан гадас”-ынхан багтаж байгаа шүү дээ...” хэмээн ханцуйдаа нуг нуг хийн бахтай байна. Энэ бол Н.Алтанхуяг, Х.Баттулга хоёрын АН доторх хүч нөлөө, байр байдлыг харуулах бодит төрх. Х.Баттулгын хэлсэн үг нам доторх ноёрхол, эзэрхийллээ илэрхийлэхийн зэрэгцээ өөр ч олон утгыг агуулж байна. “Н.Энхбаярын араас бүгдийг нь явуулаач...” гэснээс харахад түүний ойроос Н.Энхбаярыг явуул гэж захиалсан, эсвэл бүр өөрөө гардан “Авдрант”-ын хорих уруу явуулсан ч юм шиг.
    Ингэж хэн нэгнийг шорон гяндан руу явуулах эрх мэдэл ер нь бараг Х.Баттулгын таалалд байдаг юм бусуу. Даварсан Х.Баттулга одоо дараагийнхыг нь хэмээн хашхирч байгааг юу гэх вэ. Тэр биш бол түүний зөвлөгөөгөөр Н.Алтанхуяг захиалж Н.Энхбаярыг явуулсан ч юм шиг. Ямар ч л байсан Н.Энхбаярыг явуулсан “автор” АН-аас холдохгүй дүр зураг харагдана.
    АН-ын эрх ашгийн үүднээс харвал Н.Энхбаярын рейтингийг өсгөж улмаар МАХН-ыг гаргаж ирэх. Ингэснээр МАН, МАХН хоёрын саналыг хуваавал АН дундаас нь товойно гэх ядмаг санаа агуулсан ажиллагааг ажиглагчид аль хэдийнэ тайлбарлачихлаа. Үүнийг Х.Баттулга захиалаагүй гэхэд АН-ынхаа өмнөөс хэдий сул дорой ч гэсэн Н.Алтанхуяг явахаас өөр аргагүй. Тэгэхээр Н.Алтанхуяг өөрийнхөө намаас Ерөнхийлөгч болсон Ц.Элбэгдоржид л хандаж таарна. Түүнээс биш Н.Алтанхуяг МАН-ын Ерөнхий сайд С.Батболдод очоод “Н.Энхбаярыг баривчлаад, хориод өгөөч” гэж гуйв гэж дээ.
    Тэдэнд ер нь уулзах шалтгаан ч байхгүй. Ерөнхий сайд, Тэргүүн шадар сайдын гарцаагүй алба тушаалаар холбогдож л хамт нэг танхимд байв. “Сонгууль болох гэж байгаа болохоор манай нам явлаа...” хэмээн ямар ч гаргалгаагүй тайлбар хэлээд алга болсон Н.Алтанхуяг хуучин цагаа дурсах, С.Батболдтой тохой нийлүүлэхийн мөрөөсөл болж, гүйцэлдэхгүй хүсэлдээ бачуурч яваа нь үнэн.
    Тэгэхээр Н.Энхбаярыг баривчлуулах АН-ын захиалга С.Батболд хийгээд МАНд угаасаа хамаагүй. Тэгвэл Н.Алтанхуяг Н.Энхбаярыг баривчлуулахаар Ц.Нямдоржтой хуйвалдахгүй гэх газаргүй хэмээх таамаг бас бий. Шалтгаан нь UBS бүлэглэл гэх. Гэхдээ Н.Энхбаярын баривчилгаа бол Ц.Нямдоржийн Хууль зүйн сайдын албан тушаалын эрх мэдэлд хамаагүй Ерөнхийлөгчийн халаасанд орсон шүүх байгууллагын шийдвэрээр хийгдсэн ажил. “Шүүхийн шийдвэр гарчихсан байгаа учраас бид ирсэн...” хэмээн Ц.Элбэгдоржийн “халаасны хүн” Авлигатай тэмцэх газрын Мөрдөн шалгах хэлтсийн дарга Г.Амарбат гэх сахалтай нөхөр шөнөжин телевизийн камеруудын өмнө үглэсэн дээ.
    Ингээд Х.Баттулга тэргүүтэй АН-ынхан сонгуулийнхаа өмнөх амтат зууш болгон “Н.Энхбаярыг баривчлуул” хэмээн намын даргадаа үүрэг өгсөн бол Н.Алтанхуяг нь Ц.Элбэгдорж дээр очихоос өөр зам үнэндээ харагдахгүй. Дээс томж шоргоолж найзаа голоос гаргах гэсэн царцааны үлгэр шиг л. Гэхдээ үлгэрийн царцаа шоргоолжоо аврахаар үнэнчээр явдаг бол Н.Алтанхуяг хэн нэгний төлөө Ц.Элбэгдоржтой тохиролцоо хийж даанч чадахгүй. Намынхаа төлөө бүр ч чадахгүй. Харин Х.Баттулгад дарамтлуулсандаа бол явахаас өөр замгүй.
    Тэгэхээр Н.Энхбаярын баривчилгаа бол АНаас ардчилсан Ерөнхийлөгчдөө хаягласан захиалга болохыг Х.Баттулгын “Н.Энхбаярын араас...” гэсэн үг бараг л илчилчихлээ. Х.Баттулга Н.Энхбаярын нэрээр турхиран намын даргаа дайран жижигрүүлж байгаа дараагийн зорилго бол сонгуулийн дараах бялуунаас жин илүүг хүртэх явдал.
    Өнөөдөр Монголд Н.Энхбаярыг давах авлигач байх уу. Эсвэл авлигач гэхээр нэг муу чихрийн цуглуулга авдаг цэцэрлэгийн багш, эмнэлгийн сувилагчийг шалгахгүй нь лав. Харин сүүлийн үед Х.Баттулгын дургүйг ихэд хүргэсэн Ж.Оджаргал л бизнесийнхээ зорилгод улстөрчдийг хэрхэн ашигласан, урвуулсан, үүний тулд тэрбум тэрбумыг цацсанаараа жагсах байх. Авлигад өгсөн нь ч, авсан нь ч адилхан буруутдаг юм гээ биз дээ.
    Г.Оджаргалын бизнесийг лообийдсоныхоо шан харамж болгож нүдэнд харагдахгүй, гарт баригдахгүйгээр төлбөрөө халаасалсан эзэд улстөрийн хүрээнд дүүрэн. “Алтан гадас”- ын дансанд бүртгэгддэгийнхээ хувиар амаа тосдсон нөхөд АН-аар дүүрэн байна. Адаг сүүлд нь төмөр замын хэрүүлээр улстөрд хэмлүүлэн байгаа Х.Баттулга шиг фронтод тулалдахгүй хэр нь амьтай бүхнийг хувьдаа хөдөлгөн зоолж байгаа Г.Оджаргалд өширхсөн Х.Баттулга боож үхэх гээд байгаа. Тэсэрч хагарахын даваан дээр ирснээ илэрхийлэн “М Си Эс” рүү Авлигатай тэмцэх газрыг ч оруулсан.
“Монгол сүйрвэл бид Хавайд амьдарна” хэмээн ярьдаг Г.Оджаргал Х.Баттулгаас дүрвэж гадагшаа явсан. Г.Оджаргалыг Ерөнхийлөгч Ц.Элбэгдорж бол барьж хорино гэж угаасаа байхгүй. Тэд бал сараа дуусгаагүй байгаа халуухан “амрагууд”.         Тэгэхээр Н.Энхбаярыг баривчлуулахаар захиалсан шигээ Г.Оджаргалыг хориулахаар захиална гэвэл ёстой сэрүүн зүүд. АН-ын энэ сонгуулийн найдвар хоёр гол хөзөр нь долдугаар сарын 1-ний хэрэг, авлигын асуудал байлаа. Долдугаар сарын 1-ний асуудлаар ч яахав, цагдаагийн хэдэн даргыг ялласан дүнг АН-даа бэлэглэх гэсэн Ц.Элбэгдоржийн санаархал цааш явах аргагүй болтлоо мухардаж байна.
    Авлигаар бол Н.Энхбаяраас цааш барих хүнгүйг мэдэх, Г.Оджаргалын амтнаас гараагүй байгаа Ерөнхийлөгч андынхаа мөн чанарыг ч таних “Женко” зүгээр л АН-ын даргын албан суудалгүй ч Н.Алтанхуягийг босч ирэхгүй болтол нь эзэрхийлсэн зангарагаа гайхуулж байна. Ийн сонгуульд ялагдсан ч бай Н.Алтанхуягийнхыг төгсгөж, өөрийнхөө цаг үеийг АН-д эхлүүлэх Х.Баттулгын туйлын зорилго амжилттай явж байна гэх үү дээ.