Хууль бусаар ажлаасаа халагдсан гэж шүүхэд хандсан Цөмийн энергийн газрын дарга асан Ц.Энхбат сүүлийн үед чимээгүй байна. Тэр уг нь нэг хэсэгтээ л Засгийн газартай заргалдахаас гадна цөмийн хаягдлыг дарга нар булшлах гэсэн, зарим хүмүүс нууцаар гэрээ хийх шахсан зэрэг дуулиант мэдэгдэл хийгээд усанд хаясан чулуу шиг алга болжээ.
    Үнэхээр манай дарга нар нууцаар цөмийн хаягдал булшлах гэж байсан уу гэдэгт одоо болтол хариу олдохгүй байгаа. Харин Засгийн газартай зад шүүхдэлцсэн Ц.Энхбатийн сураг алдарсан түүх сонирхол татаж эхэллээ. Тэрээр ажлаасаа чөлөөлөгдөхөөсөө өмнө долоо хоногийн хугацаанд уран болон газрын ховор элементийн 30 орчим зөвшөөрлийг гадаад, дотоодын хөрөнгө оруулагчдад дур мэдэн олгосон сурагтай. Түүний энэхүү үйлдлийг эрх мэдлээ ашигласан гэж үзэн Үндэсний аюулгүй байдлын зөвлөлөөс уг зөвшөөрлүүдийг хүчингүй болгох чиглэл өгсөн гэж зарим хүмүүс ярьж байна. Энэхүү чиглэлийн дагуу лицензүүдийг цуцалжээ. Гэтэл компаниуд нь шүүхдэлцэж эхэлсэн байна. Ийм нэгэн дуулиант хэрэг Цөмийн энергийн газар чимээгүйхэн газар авчээ. Харин уг үйл явцыг АТГ-ынхан аль хэдийн анхаарлын төвдөө авсан гэж эх сурвалж мэдээллээ. АТГ-ынхан Ц.Энхбатыг эрх мэдлээ ашигласнаас гадна авлигал авсан байж магадгүй гэж хардаж сэрдсэн бололтой.

    Олон нийтийн анхаарлын төвд байж байгаад олон хүн цэрэвдэг газрын анхааралд өртсөн Ц.Энхбатыг яагаад ажлаас нь чөлөөлсөн бэ? Түүнийг "Засгийн газрын удаа дараагийн хуралдаанд ирээгүй" гэсэн үндэслэлээр чөлөөлсөн юм. Түүнээс гадна Цөмийн энергийн газрын дэд дарга Ц.Дамдинсүрэн, "Мон-Атом" компаний захирал Р.Бадамдамдин нарыг ч гэсэн ажлаас нь бөөндөн чөлөөлжээ. Учир нь нэг хэсэгтээ дуулиан шуугиан болоод байсан цөмийн хаягдлыг булшлах гэсэн асуудлаас болон хариуцлага тооцсон юм. Өөрөөр хэлбэл нийгмийн санаа бодлыг өөрчилсөн, буруу зөрүү ойлголт өгөөд байхад мэргэжлийн байгууллагуудын хувьд үнэн зөв мэдээлэл өгөөгүй, хариуцлагагүй хандсан зэрэг нь хариуцлага тооцох эх сурвалж болжээ. Тэдгээрээс Ц.Энхбат нь өөрийгөө хууль бусаар ажлаас халлаа гэж Засгийн газартай заргалдсан юм. Заргалдаж байх үед олон сонирхолтой мэдээлэл өгч, мэдэгдэл хийсэн нь хэвлэлийн хуудаснаа үлджээ. Тэрбээр “Хэн цөмийн хаягдлын тухай ярьж, хэн очиж тохиролцож байсан нь бүгд цөм эзэнтэй. Харин үүнийг нь эсэргүүцсэн хүнийг л зайлуулах гэж оролдож байна” хэмээн ярьж цөмийн хаягдлыг Монголд хэн булшлах гэж байгаа эзнийг мэдэж байгаагаа гэрчилсэн юм. Тэр ч бүү хэл “Одоогийн парламентад энэ талаар ярьсан нэр бүхий хүмүүс бий. Гэхдээ одоохондоо тэдний нэрийг хэлэхээ больё. Өөрсдөө эхэлж ярьчихаад шуугиан дэгдээд эхлэнгүүт нь “үгүй, үгүй” гээд байгаа юм. Төрийн тусгай байгууллагууд мэддэг л байгаа даа. Мэдэхгүй бол шалгаад үзэхэд гараад ирнэ дээ” лавшруулжээ. Үнэхээр тухайн үед төрийн тусгайгийнхан уг асуудлыг анхаарлын гадна үлдээгээгүй нь мэдээж. Урт хэл хүзүү орооно гэгчээр энэ мэт сонирхолтой мэгдэлүүдээсээ ч болж шалгагдаж байж болох юм. Ямартай ч гэсэн түүнийг холбогдох байгууллагууд хараанаасаа гаргахгүй байгаа бололтой.
   
   Ц.Энхбатыг Цөмийн энергийн газрын даргаас чөлөөлөхөд хамгийн идэвхитэй оролцсон хүн нь ЗГХЭГ-ын дарга Ч.Хүрэлбаатар гэж эх сурвалжууд мэдээлдэг. Өмнө нь Ч.Хүрэлбаатар АТГ-ын дарга Д.Батхуягийг чөлөөлж байсан юм. Д.Батхуяг, Ц.Энхбат хоёр ерөнхий сайд асан С.Баярын гарын хүмүүс. Ийм учраас л С.Баяр, Ч.Хүрэлбаатар хоёрын хоорондын харилцаа хөндий байдаг бололтой. С.Баярын дотны хүмүүсийг Ч.Хүрэлбаатар ажлаас нь чөлөөлж дөнгөсөн. Дараа нь тэдний нэгийг “аавынд” хийчихсэн. Одоо нөгөөг нь сонирхож байгаа бололтой. Энэ бүхэн С.Баяр гэдэг том "акул"-д хүрэх гэсэн өрсөлдөгч нарынх нь хийж байгаа ажиллагаа гэж зарим хүн таамаглаж байна. Ийнхүү С.Баярын ойр дотны хүмүүсийг АТГ-ынхан сонирхож байж мэдэх юм.