Дотоод Хэргийн Их Сургуулийн төгсөх курсын оюутнууд сургуулийн захиргаанаасаа нийт 21,5 сая  гаруй төгрөг нэхэмжилжээ. Учир нь тус сургуулийн Хилийн албаны сургуулийн захирал Ц.Ганболд нь эрх зүйн ангийн дөрөвдүгээр курсын оюутнуудын төлбөрийн зөрүү болох 150.000 төгрөгийг олгохгүй хоёр жил болж байгаа юм байна. Төлбөрийн зөрүүгээ авч чадахгүй байгаа оюутнууд нь 5-р сарын 18-нд сургуулиа төгсөх тул энэ мөнгөө яаралтай авахыг хүсч байгаа аж.  Тэд энэ талаар Хилийн албаны сургуулийн захирал Ц.Ганболдод өргөдөл гаргаж, очиж уулзах тоолонд “Би нягтлан бодогчдоо хэлчихсэн байгаа удахгүй өгнө” гэсэн хариулт өгдөг аж. Үүгээр зогсохгүй ДХИС-ийн захирал Ж.Болдбаатар нь оюутнуудынхаа дөрөв дүгээр сарын 70.000 төгрөгийг одоо болтол олгоогүйгээр барахгүй тав дугаар сарын 70.000 төгрөгийг тус сургуулийн хандивт авна гэж оюутнуудад зарласан байна. Тиймээс оюутнуудын эцэг эхчүүд хоёр хоногийн дотор оюутануудын дөрөвдүгээр сарын 70.000 төгрөг болон төлбөрийн зөрүү болох 150.000 төгрөг өгөхийг шаарджээ. Эрх зүйн ангийн 98 оюутан тус бүр 220.000 төгрөг, нийт 21.560.000 төгрөгөөр хохироод байгаа тул ДХИС-ийн захирал Ж.Болдбаатар, Хилийн албаны сургуулийн захирал Ц.Ганболд нараас дээрх мөнгийг нэхэмжилж байгаа аж.