Оросын сөрөг хүчний удирдагч Борис Немцовыг хөнөөсөн хэрэгт зургаан хүнийг сэжиглэн баривчилсан билээ. Гэтэл уг хэргийн хоёр сэжигтэн олдохгүй байгаа тухай Оросын хэвлэл мэдээллээ. Тодруулбал, хэргийн сэжигтнүүдийг гэрчилсэн бичлэг олдсоны улмаас хоёр сэжигтэн нуугдсан гэдгийг тогтоогоод байгаа аж.

Борис Немцов энэ оны хоёрдугаар сарын 27-ны орой Москва хотын төвд алагдсан юм. Энэ хэрэгт сэжиглэн Заур Дадаев, Тамерлан Эскерханов, Анзор болон Шагит Губашев, Хамзат Бахаев нарыг баривчилсан. Таамаглаж буйгаар Немцовын аминд халддаг өдөр Шаванов ажиглалт хийх үүрэг гүйцэтгэж, Губашев жолоочоор ажиллаж, Дадаев гар буугаар бууджээ. Шаванов баривчлах үед алагдаж, Геремеев, Мухудинов хоёр нуугдаад баригдахгүй байгаа хэмээн хэргийг мөрдөгчид мэдээлсэн байна.

Хэргийн материалууд дотор энэ хэрэгт оролцсон гэгдэж буй хүмүүс, тухайлбал Заур Дадаев, Руслан Геремеев нарын дүрс буусан цахим бичлэг байгаа аж. Уг бичлэгийг хоёр дугаар сарын 28, гуравдугаар сарын 1-нд нисэх онгоцны буудал дээр хийсэн байжээ. Анзор Губашев, Бислан Шаванов нар Москвад ирж, үүргээ гүйцэтгэчихээд Грозны руу нисэж буй нь уг бичлэгээс харагдаж байсан гэнэ. Геремеев, Дадаев, Руслан Мухудинов нар ирж буйг нь ч хальсанд бас буулгаж авсан байжээ. Мухудинов танилуудтайгаа салах ёс гүйцэтгэчихээд 007 гэсэн ул- сын дугаартай Mercedes ML машиндаа суугаад явчихаж байгаа нь бичигдсэн байна.

Түүнээс гадна Дадаев, танил Шаванов нар өөрийг нь хүн зөөх зэрэг ажилд туслуулж, ашигласнаас биш Немцовыг алахад ямар ч буруугүй гэж Губашев мэдүүлэг өгсөн байна. Түүний хэлснээр бол Немцовыг алахаар бэлтгэсэн, зорилгоо хэрхэн биелүүлснийг тэрбээр огт мэдэхгүй аж. Москвад байрлаж байсан газар нь Геремеев үе үе ирдэг байсан гэж сэжигтэн мэдүүлжээ.

Г.Үжин