Хойд эх, төрсөн эцгийнхээ гарт амиа алдсан 4 настай охин, төрсөн эцэгтээ зодуулж 5 цаг тарчилсан хүү, 2 настай охин, 8 настай хүүгээ өдөржин хазаж тамласан эцгийн үйлдэл, өвлийн хүйтэнд харанхуй, хүйтэн орц руу хөөгдсөн хоёрхон настай охин, согтуу аавдаа заазуурдуулж гэмтсэн хүү гэх мэт  нийгмийг цочроосон олон хэргийг бид өмнө нь сонсож байсан.

Өр өвтгөж, сэтгэл сэмрүүлэх энэ мэт хэргүүдийн тоо жил ирэх бүр нэмэгдсээр байгааг хуулийн байгууллагынхан онцолдог. Энэ нь эргээд хүүхдийн эрхийг хамгаалах Төр Засгийн бодлого хойрго гэдгийг илтгэдэг билээ. Цагдаагийн байгууллагын гаргасан судалгаагаар энэ оны эхний 3 сарын байдлаар Монгол улсад гэр бүлийн хүчирхийллийн 144 хэрэг гарчээ. Энэ нь өнгөрсөн оны мөн үеийнхээс 14.2 хувиар өссөн үзүүлэлттэй байгааг цагдаагийнхан мэдэгдэж байна. Өнгөрсөн 3 жилийн хугацаанд 40 гаруй эмэгтэй гэр бүлийн хүчирхийлэлд өртөж амь насаа алдснаас гадна олон тооны хүүхэд эрүүл мэнд, бие мах бодиороо хохирсон байна.

Энэ мэт мэдээ, мэдээллүүд нь “Монголын төр хүүхэддээ анхаарал тавих цаг болсон" гэдгийг сануулж буй.

Бүгдийг нь сургууль, цэцэрлэгт хамруулж цаашлаад аюулгүй орчинд амьдруулна гэж том дуугардаггүй юм аа гэхэд хүүхдийг гарын шүүс болгож, хүчирхийлж буй эцэг, эхэд хүлээлгэх хариуцлагыг өндөржүүлэх нь хамгийн эхэнд хийх алхам билээ.

Тиймээс хүүхдийн эрхийг ноцтойгоор зөрчсөн нөхдүүдэд хариуцлага тооцохыг хуулиар зохицуулна гэдгийг салбар яамны сайд мэдэгдлээ. Ерөнхий сайдын тэргүүлдэг Хүүхдийн төлөө үндэсний зөвлөл  өчигдөр Төрийн ордонд хуралдаж,   Хүүхдийн хөгжил, хамгааллын өнөөгийн байдал, цаашдын бодлогын чиглэл, 2015-2020 он хүртэл баримтлах хүүхэд хамгааллын бодлогын хүрээний баримт бичгийн төслийг хэлэлцэв. Уг бодлогын баримт бичгийн төсөлд  хүүхдийн хүртэх эрхтэй нийгмийн суурь үйлчилгээг дэмжсэн хүүхэд хамгааллын дэд тогтолцоог хөгжүүлэхээр тусгажээ.

Хэрэгтэнд хариуцлага хүлээлгэх хуультай болж байна гэдэг дэвшил юм.

Хүн амын хөгжил, нийгмийн хамгааллын сайд С.Эрдэнэ дээрх хуулиудийг яаралтай батлах шаардлагатай гэж хэлж байна. Мөн хүүхдийн  эрхийг хамгаалах  улсын байцаагчтай болохоор хуулийн төсөлд тусгасан байна. Ингэснээр хүүхдийн аюулгүй байдлыг хангах, тодорхой арга хэмжээ авах, торгууль ногдуулах, тэр бүү хэл  тухайн байцаагч хүүхдийн өмнөөс өмгөөлөл, нэхэмжлэл гаргах эрхтэй болно. Хүүхдийг жижигхэн биетэйгээр далимдуулан дарамтлавал Хүүхдийн байцаагч нар хүүхдийн өмнөөс гомдол гаргаж, цагдаагийн байгууллагад хандан хэрэг үүсгэнэ гэсэн үг. 

Цаашлаад хууль зөрчсөн аав, ээжүүдийн эцэг, эх  байх эрхийг нь хүртэл хасахыг хуулинд тусгаж өгч байгаа аж. Мөн юу хийдэг нь мэдэгддэггүй Хүүхдийн төлөө нэртэй 140 гаруй төрийн болон төрийн бус байгууллагын үйл ажиллагааг цэгцэлж, эрх үүргийг нь тодорхойлох эрх зүйн зохицуулалтыг хийх юм байна. Ингэснээр Хүүхдийн төлөө үйл ажиллагаа явуулдаг байгууллага, ажилтнууд тодорхой эрх үүрэг эдэлж, хэрэгжүүлж чаддаг эрх зүйн зохицуулалттай болох гэнэ.

Хүүхэд, амь нас, эрүүл мэндээрээ хохирсоны дараа Хүүдийн төлөөх байгууллагууд болон Хуулийн салбарынхан дуугарч эхэлдэг нь ниргэсэн хойно нь хашгирахтай адил зүйл болдог. Харин дээрх хуулиуд батлагдвал хүүхдийг хүчирхийлэлд өртөхөөс нь өмнө хамгаалж чадна гэж мэргэжилтнүүд ярьж байгаа юм.

Т.Энхэлээ