УИХ-ын гишүүн, Ардчилсан намын ҮБХ-ны Дотоод сонгуулийн хорооны дарга С.Эрдэнэболд хэлэхдээ "АН-ын даргыг ҮБХ-ны 390 гишүүн сонгоно. Түүнээс биш аль нэгэн нам, улс төрийн хүчин, аль нэгэн мөнгө, явцуу ашиг сонирхол шийдэх боломж үгүй.

Нийгэмд янз бүрийн цуурхал явж байж болно. Угаасаа Ардчилсан нам нээлттэй, бидний алдаа оноо ард түмний нүдэн дээр байдаг. Бид иргэдээсээ юуг ч нуухгүй явж ирсэн. Цаашдаа ч нуухгүй. АН бол хуультай улсын түүхтэй нам юм. Тиймээс бид ямар нэгэн байдлаар явцуу ашиг сонирхолд өртөхгүй, саруул ухаант хүмүүсийн сонголтоор АН-ын дараагийн даргыг сонгож чадна гэсэн итгэл үнэмшил төгс байгаа. 

Ташрамд, хэн нэгэн хүний нэрийг дурдах боломжгүй байна. Өнөөдөр АН-ын 200 мянган гишүүн дотроос өөрийн гэсэн итгэл үнэмшилтэй, ачаа үүрэх сэтгэлийн хаттай, боловсролтой, эх оронч, үнэт зүйлтэй аавын хүү, ээжийн охинд энэ намын дарга болох индэр нь нээлттэй байгаа. Ардчилсан намын гишүүн, мөн ардчилалд итгэдэг, дэмждэг, магадгүй түүнийг эсэргүүцдэг хэн ч байсан үзэл бодлоо чөлөөтэй илэрхийлэх эрхтэй.

Бид аливаа шүүмжлэлийг хүлээж авна. Гагцхүү шүүмжлэл хэлэх эрх чөлөөг нь АН ямагт хамгаална.

Тэр утгаараа АН-ын тухай ярьж байгаа эерэг, сөрөг ямар ч үг нээлттэй. Үүнд бид ямар нэгэн тодруулга, тайлбар хэлэхгүй. Тиймээс АН-ын хаалга хэн бүрд нээлттэй. Ардчилсан нам дүрэмтэй, журамтай учраас итгэл үнэмшлийнхээ төлөө тууштай зүтгэж чадах, тодорхой шаардлага шалгуурыг хангасан хүмүүс манлайд явах нь зөв гэж шийдэж дүрмээ баталсан юм. Бид 1300 гаруй хүний баталсан дүрмийн дагуу явж байгаа. Тэдгээр хүмүүс Монгол Улсын 21 аймаг 330 сум, 1500 баг, Улаанбаатар хотын 9 дүүрэг, 150 гаруй хорооноос сонгогдож, ард түмний илгээлтийг авч ирсэн хүмүүс байсан. Дүрмийн дагуу л сонгуулиа явуулна, хэн нэгэнд зориулж өөрчлөх боломжгүй. Сонгон шалгаруулах хороо ямар нэгэн хувь хүний итгэл үнэмшлээр бус зарчмын дагуу хандаж байгаа гэдгийг хариуцлагатайгаар хэлье" гэдгийг дурдлаа. 

М.Гал