Сири, Иракын үлэмж нутгуудыг эзэлж, хяналтаа тогтоогоод буй “Исламын улс” бүлэглэлийн ахмад дайчид тагтааны үржүүлгийг хориглох захирамж гаргахыг хүссэн нь батлагджээ. Тагтаа сүсэглэгчдийн толгой дээгүүр нисдэг нь Аллахад залбирахад саад болж, исламын шашныг гутаан доромжилж байгаа тул тэдний үржүүлгийг зогсоох хэрэгтэй хэмээн хэт даврагчид үзсэн байна.

Тиймээс "Исламын улс" хяналтаа тогтоосон бүс нутгууддаа тагтаа үржүүлгийг хориглож, захирамжийг зөрчсөн тохоилдолд шоронд хорих, торгох, олон нийтээр зодох гэсэн хатуу шийтгэлүүдийг тусгаж өгсөн байна.

Хэт даврагчид тагтаа тэжээдэг, үржүүлдэг иргэдийг долоо хоногийн дотор уг үйл ажиллагаагаа зогсоохыг тушаажээ. Түүнчлэн цэргүүд айл өрхүүдийг нэгжиж, олсон шувуугаа шатааж эхэлсэн гэлээ.

Гэвч эзлэгдсэн нутгуудын оршин суугчид тагтаа үржүүлгийг хориглож буй шалтгааныг өөрөө харж байгаа гэх шум байна. Тагтааг "Исламын улс"-ын эсрэг мессеж хулгайгаар зөөвөрлөхөд ашиглаж байгаа учраас ийм утгагүй шалтгаанаар хориг тавилаа хэмээн ярьж байна.  

Энэ нь "Исламын улс" анх удаа тагтаа үржүүлгийг хориглох гэсэн хэрэг биш юм. Өнгөрсөн нэгдүгээр сард тус бүлэглэлийн дайчид зүүн Иракт 15 хүүг баривчилж гурвыг нь цаазаар авсан юм. Тэднийг Аллахад мөргөхийн оронд тагтаа тэжээж цаг үрлээ хэмээн шийтгэсэн билээ. Гэвч энэхүү харгис анхааруулга нь хүмүүсийг тагтаа тэжээхийг зогсоож чадаагүй юм.

Тагтаа үржүүлэх нь Ойрхи Дорнодод ихээхэн дэлгэрсэн хобби бөгөөд уламжлал шахуу ажил хэмээн үнэлэгддэг байна.

Г.Үжин