Улаанбаатар хотын захирагч Г.Мөнхбаяр 2012 оны УИХ-ын сонгуульд Чингэлтэй дүүрэгт нэр дэвших хүмүүсийн нэг гэж тооцогдож байсан билээ. Түүнийг нэр дэвших гэж байгаа талаар янз бүрийн яриа гарч байсан. Тэгвэл хотын дарга Г.Мөнхбаяр энэ асуултанд өнөөдөр болсон Яармаг-Нисэх-Нисэхийн товчоо, Сонсголонгийн гүүр-Нисэхийн товчоо хүртэлх 13,7 км автозам барих ажлын нээлтийн үеэр тодорхой хариу өгөв. Тэрбээр,- Улс төрд хэдэн жил хутгалдсан хүний хувьд УИХ-д нэр дэвшихэд надад болохгүй юм байхгүй. Гэхдээ би УИХ-д нэр дэвшихгүй. Надад хотод эхлүүлсэн, дуусгасан, гүйцээх, дахиад хийх олон ажил бий. Улстөрч гэхээсээ би инженер хүн. Энэ мэргэжил маань хотод байгаа тулгамдсан олон асуудлыг шийдвэрлэхэд илүү ойр дөт байдаг. Тиймээс хотдоо үлдэж ажлаа үргэлжлүүлнэ гэж тодорхой хариулсан юм.
Хотын дарга Г.Мөнхбаяр УИХ-ын сонгуульд нэр дэвшихгүй гэдгээ албан ёсоор зарласнаар Чингэлтэй дүүрэгт МАН-аас УИХ-ын гишүүн Д.Очирбат, Эрдэс баялаг, эрчим хүчний сайд Д.Зоригт нар сунгаанд үлдэж байна. Харин АН-аас УИХ-ын гишүүн Г.Баярсайхан, Чингэлтэй дүүргийн АН-ын дарга Батын Батбаяр нар нэр дэвших нь тодорхой болоод байгаа билээ.
Энэ тойрог хоёр мандаттай болсон, өмнө нь сонгогдсон гурван УИХ-ын гишүүн дахин нэр дэвшихээр болж байгаа тул ширүүн өрсөлдөөн болно гэж үзэж байгаа юм. Өмнө нь 2009 оны нөхөн сонгуулиар МАН /МАХН/-аас Н.Энхбаяр нэр дэвшихээр зүтгэж байсан ч түүний оронд Д.Зоригтыг гаргасан нь тус намын дотор хагарал үүсч, МАН ба МАХН гэсэн хоёр нам болох эхлэл болсон гэж ажиглагчид үздэг билээ.
