Tөв цэнгэлдэхийн ногоон зүлэг, ногоог хиймэл зүлгээр солих ажлыг өнгөрсөн дөрөвдүгээр сарын сүүлээс эхлүүлж одоогийн гүйцэтгэл нь 70 хувьтай байна.

Уг ажлыг бөхчүүд болон бөх сонирхогчдоос хиймэл зүлгэн дээр барилдаад, гэмтэж бэртэх эрсдэлтэй гэж байгаа ч хиймэл зүлгийг норгож үзээд байгалийн зүлэгнээс халтиргаа багатай болохыг туршиж үзсэн гэх тайлбарыг хэрэгжүүлэгчид хэлж байна. Пүрэв гарагт зүлэг дэвсэх суурь буюу цэнгэлдэхийг төв хэсгийн хөрсийг цементээр бүрэн хучиж дуусчээ. Уг цементэн суурин дээр Голланд улсаас авчирсан зургаан см-ийн өндөртэй хиймэл зүлгийг дэвсэх юм. Мөн хиймэл зүлгэний дээр зөөлөвч буюу гурван см зузаан хамгаалалтын элсийг дэвсэнэ. Ирэх амралын өдрүүдээс эхэлж хиймэл зүлгийг дэвсэх ажил 14 хоног үргэлжилнэ.

“Энэхүү ажилд нийтдээ нэг тэрбум 200 сая төгрөг зарцуулж байгаа. Тус зардлыг улсын төсвөөс бус зөвхөн хувьцаа эзэмшигчдийн хөрөнгөөр хийж байгаа” гэдгийг Төв цэнгэлдэх хүрээлэн" компанийн захирал Т.Нямдаваа онцолж байв. Мөн хөнгөн атлетикийн гүйлтийн зам тавьж, ус зайлуулах хоолой хийх зэргээр тохижилтын цогц ажил хийхэд тус хөрөнгөнөөс гаргах юм.

Монголын үндэсний бөхийн холбооноос уг зүлэгтэй холбоотой асуудлаар хариуцлага хүлээхгүй гэсэн байр сууриа хувьцаа эзэмшигчдэд илэрхийлсэн. Төв цэнгэлдэх хүрээлэнг олон улсын стандартад нийцсэн хиймэл зүлэгтэй болгосноор байнгын тогтмол үйл ажиллагаа явуулах боломжтой болно. Харин цаашдаа төсөв, хөрөнгө гаргаж байгуулсан “Монгол наадам” цогцолбортоо уламжлалт эрийн гурван наадмаа тэмдэглэдэг болох нь хамгийн зөв сонголт юм.