“ВВС” агентлагийн сурвалжлагч эмэгтэй Ахмен Хаважа Их Британийн хатан хаан Елизабетийг өвчилжээ хэмээн бичсэнийхээ төлөө уучлал гуйсан байна. Тэрээр “Худал түгшүүр байлаа. Хэн нэгэн эмзэглэж тэвдсэн бол уучлал хүсье” хэмээн твиттер хуудаснаа бичсэн байна.

Сэтгүүлч өмнө нь хатан хааныг өвчний улмаас Лондонгийн эмнэлэгт хэвтэн эмчлүүлж байгаа хэмээн бичсэн юм.

“Хатан хаан өнөөдөр өглөө Лондонгийн эмнэлэгт очиж жил бүрийн уламжлалт үзлэгтээ орсон. Энэ бол зүгээр  л урьдчилан сэргийлэх үзлэг байсан болохоор хатан хаан эмнэлгээс тэр дороо явсан” гэж Букингемийн ордны төлөөлөгч мэдээлсний дараа сэтгүүлч уучлал хүссэн байна.

Хатан хааныг өөд болсон тохиолдолд “ВВС”-гийн ажилтнууд хэрхэн ажиллах талаар байнга хийж байдаг ээлжит нэгэн бэлтгэл дадлагын үеэр ийм алдаа гарсан аж. Сэтгүүлч бүсгүйн хэлснээр бол тэрбээр хэсэгхэн хугацаанд утсаа эзэнгүй орхисон нь ийм уршиг тавьсан гэнэ.

Г.Үжин