Өчигдөр Туркын парламентын сонгууль боллоо. Туркын эрх баригч АК нам (Шударга ёс, хөгжлийн нам) парламентын сонгуульд ялалт байгуулсан байна. Гэхдээ АК нам сонгуульд олонхи болж чадаагүй байна.
Энэ нь сүүлийн 13 жил тасралтгүй үргэлжилсэн дангаар эрх баригч нам статусыг таслахад хүргэжээ.
2015 оны парламентын сонгуульд бас нэгэн онцлох үйл явдал болжээ. Энэ бол курдуудыг дэмжигч зүүн жигүүрийн Ардын ардчилсан нам анх удаа сонгуулийн саналын босго болох 10 хувийг давсан явдал юм. Ингэснээр суудлуудын хуваарилалт болон эрх баригч намын дангаар захирах хүчийг өөрчлөхөд хүргэлээ хэмээн олон улсын ажиглагчид үзэж байна.
Сонгуулийн хорооны мэдээлснээр одоогийн байдлаар нийт саналын 99.94 хувийг тоолж дуусчээ. АК нам 40.8 хувь, гол сөрөг хүчин Бүгд найрамдах Ардын нам 25 хувийн санал авчээ. Харин Үндэсний хөдөлгөөн нам 16.3 хувийн санал авсан байна.
Сонгуульд санал өгөх эрх бүхий 54 сая иргэдийн 86 хувь нь оролцсон аж.
Туркын парламент 550 суудалтай. Хамгийн багадаа 276 суудал авсан нам олонхи болдог юм. Харин АК нам 258 суудал, Бүгд найрамдах Ардын нам 132, Үндэсний хөдөлгөөн нам 81, Ардын ардчилсан нам 79 суудал авах нь тодорхой боллоо.
Сүүлийн 13 жилийн турш парламентад олонхи болсон АК нам одоо 311 суудал эзэмшдэг юм.
Г.Үжин
