Мексикчүүд өчигдөр завсрын сонгуулиа өгч дууслаа. Сонгуулийн насны 80 сая хүн Конгрессын Доод танхмийн гишүүд болон олон зуун хотын дарга, есөн амбан захирагчийг сонгосон юм.

Сонгуулийн хорооны урьдчилсан дүнгээр Ерөнхийлөгч Енрике Пена Нието болон түүний Институцийн хувьсгалын нам Конгресст олонхи суудлаа хадгалж үлдэнэ хэмээн үзэж байна. Гарцан дээрх санал асуулга ч мөн ийм дүгнэлтэд хүрсэн билээ.

Урьдчилсан дүнгээр Институцийн хувьсгалын нам 30 хувийн саналаар ялалт байгуулах бол Үндэсний үйл ажиллагааны нам 22 хувийн санал авчээ.

Завсрын сонгууль хүчирхийлэл дунд өрнөснийг олон улсын хэвлэлүүд онцолж байна.

Сонгуулийн өмнө олон арван нэр дэвшигч алагдсан бөгөөд эзэн нь тодроогүй боловч хар тамхины бүлэглэлүүд байж мэднэ хэмээн мэдээлээд өнгөрсөн юм.

Түүнчлэн сонгуулийн санал хураалтын буюу ням гаргийн өглөө Тикстла хотод өнгөрсөн жил сураггүй болсон 43 оюутны ар гэрийнхэн үймээн самуун дэгдээж, сонгуулийн сурталчилгааны самбаруудыг нураасан байна. Тэдгээр хүмүүс үр хүүдүүдэд нь юу тохиолдсоныг сонгуулиас өмнө хэлэх ёстой хэмээн эрх баригчдыг буруутгажээ.

Харин энэ үеэр Чиапас муж улсад боловсролын шинэчлэлийг эсэргүүцсэн багш нарын холбоо санал хураах байруудыг сүйтгэж, саналын хуудсуудыг шатаасан байна.

Гуерреро муж улсад Консерватив намын байранд тэсрэх бөмбөг шидсэн хэрэг гарсан бол Оаксака муж улсад олон 10 мянган хүн эсэргүүцлээ илэрхийлж саналын хуудсуудыг шатаасан аж. Мөн тус мужийн Оаксака хотын экс даргыг саналаа өгчихөөд сонгуулийн байрнаас гарахад нь толгойд нь буудаж хөнөөсэн хэргүүд гарсан байна.

Энэхүү хүчирхийлэлт хэргүүдийн дараа Ерөнхийлөгч сонгуулийн санал хураах байр бүрт цагдаа нар болон хамгаалалтын албаныхныг томилжээ.

Сонгуулийн үндэсний хороо тун удахгүй санал хураалтын дүнг олон нийтэд танилцуулах юм. Гэвч нийгмийн сэтгэл зүй тогтворгүй байгаа учраас сонгуулийн дүнгээс шалтгаалсан эмх замбараагүй байдал үүсэхийг үгүйсгэхгүй байна.

Г.Үжин