Их долоон орны төрийн тэргүүнүүдийн уулзалт Германд болж өндөрлөлөө. Уг уулзалтаар Герман, АНУ, Их Британи, Франц, Канад, Япон, Италийн төрийн тэргүүнүүд хүлэмжийн хийн ялгаруулалтыг бууруулах, Грекийн өрийн хэлэлцээрийг хугацаанд нь хэрэгжүүлэх болон Украины дайныг хэрхэн зохицуулах зэрэг асуудлуудыг голчлон хэлэлцжээ.

Уулзалтын дараа өчигдөр Германы канцлер Ангела Меркель хамтын хэлэлцээрийн шийдвэрийн тухай олон улсын хэвлэлийнхэнд мэдээлэл өглөө. Түүний ярьснаар Грек зөвхөн шинэчлэлийн санал, төлөвлөгөөгөө тодорхой гаргасан тохиолдолд Европ уг асуудалд эв санааны үүднээс анхаарна гэжээ. Мөн тэрээр Грекийн эрх баригчдад хандан Грекийг Евробүсэд хадгалах тохиролцоог хийх цаг хугацаа урсан өнгөрч буйг анхааруулсан байна.

Баварын нурууны Эльмау ордонд болсон уулзалтын хамгийн гол сэдэв нь Грекийн хямрал байсан хэмээн уулзалтыг зохион байгуулагч Ангела Меркель онцолжээ.

Европын хороо тусламжийн мөнгөний дараагийн хэсэг болох 7.2 тэрбум еврог шилжүүлэхээс өмнө Грекийг татварын өсөлт, төрийн албан хаагчийн цалин, тэтгэмжийг танах зэргийг оролцуулаад эдийн засгийн томоохон шинэчлэл хийхийг шаардаж байгаа билээ. Гэвч Грек өрийн гэрээний бүтцийг шинэчлэн өөрчлөөгүй байхад Европын хорооны дээрх саналуудаас эрс татгалзаж байгаа нь тус улсыг Евробүсээс гаргах уу гэдгийг хэлэлцэхэд хүргээд байна.

Ангела Меркель Грекийн Ерөнхий сайд Алексис Ципрастай лхагва гарагт Брюссельд болох Европын холбоо-Латин Америкийн чуулга уулзалтын үеэр уулзана хэмээн хүлээж байгаа юм.

Түүнчлэн Их долоо дэлхийн томоохон гүрнүүдийг хүлэмжийн хийн ялгаруулалтаа бууруулахыг уриалсан бөгөөд 2050 он гэхэд сэргээгдэх болон цөмийн эрчим хүчийг ихээр ашиглана хэмээх амлалтанд гарын үсэг зуржээ.

Харин Украины асуудлаар ОХУ-ыг өнгөрсөн хоёрдугаар сард баталсан хэлэлцээрийг биелүүлнэ хэмээн харж байгаагаа илэрхийлжээ. Гэвч шаардлагатай бол хориг арга хэмжээнүүдийг улам чангатгана гэдэг байр сууринд Их долоогийн удирдагчид нэгдсэн байна.

Өнгөрсөн жил Крымийг нэгтгэснээс хойш ОХУ-ыг эдийн засгийн хүчирхэг гүрнүүдийн холбооноос хасч “Их 8” орон гэх нэршил “Их 7” –оор солигдсон билээ.

Г.Үжин