Италийн засгийн газрын төлөөлөгчид Цагаачдын асуудлаас болж муудалцаж байгаа тухай “CNN” агентлаг мэдээлээ. Тодруулбал, Ерөнхий сайд Маттео Рензи цагаачдыг хүлээж авахаас татгалзсан хойд бүсийн захирагчид руу дайрч эхэлсэн байна.

Өчигдөр Засгийн газрын тэргүүн хойд мужийн удирдагчдыг Газар Дундын тэнгисээс цагаачид хүлээж авахгүй гэсэн нэгдсэн байр суурьтай байгааг хатуу шүүмжилжээ. Ерөнхий сайд Маттео Рензи “Европын холбоог цагаачдын асуудалд туслахыг хүлээхэд хэцүү ийм үед зарим мужийн захирагчид асуудлыг өөрсдөөсөө бултуулаад л орхичихож байна” хэмээн хэлжээ. Тэрээр Европын бусад орнуудыг Италиас цагаачдыг хүлээн авахыг уриалжээ. Түүнчлэн 24 мянган цагаачийг гишүүн орнуудад дахин байршуулна гэсэн Европын холбооны төлөвлөгөөг хангалттай их хэмжээний тоо биш хэмээн шүүмжилсэн байна.

Хойд нутгийн Ломбарди, Лигуриа, Венето мужийн захирагчид цагаачдыг хүлээж авахгүй гэдгээ албан ёсоор мэдэгдээд байгаа юм. Эдгээр мужууд нь цагаачдын урсгалд хамгийн ихээр өртдөг бөгөөд Италийн нийт цагаачдын 15 хувь нь дээрх мужуудад суурьшдаг аж.

Итали нь хамгийн олон цагаачдыг хүлээж авч буй оронд тооцогдож байна. Энэ онд л гэхэд Италид 50 мянга гаруй хүн цагаачлан очсон. Мөн энэ жил тус Италийг 200 мянга /2014 онд 170 мянга байсан/ орчим хүн зорино хэмээн таамаглаж буй тухай судлаачид анхааруулсан билээ.

Европын орнуудыг зорьсон 1500 хүн энэ жил Газар дундын тэнгист оршуулагдсан тухай НҮБ анхааруулж, улс орнуудыг цагаачлалын бодлогодоо уян хатан хандахыг уриалж байгаа юм.  

Г.Үжин