Мяньмарын сөрөг хүчний удирдагч Ан Сан Су Чи анх удаа БНХАУ-д айлчлах гэж байна. Өнөөдөр эхлэх айлчлал 4 өдөр үргэлжилнэ хэмээн түүний Мяньмарын Ардчиллын үндэсний лиг намаас мэдээлжээ.
Ан Сан Су Чи Ерөнхийлөгч Ши Жинпин болон Ерөнхий сайд Ли Көцянь нартай уулзах юм байна.
Хоёр орны харилцаа сүүлийн жилүүдэд хилийн ойролцоох хүчирхийллүүдийн улмаас хөндийрсөн юм. Хамгийн сүүлд л гэхэд өнгөрсөн гуравдугаар сард Мяньмарын босогчид засгийн газрын цэргүүдтэй мөргөлдсөнөөр Хятадын өмнөд хэсэгтэй хиллэх Юннань аймгийн хилд нэвтрэн үймээн дунд Хятадын 5 иргэн амиа алдсан юм. Энэхүү нөхцөл байдал хоёр орны харилцааг хурцатгасан билээ.
Тиймээс Ан Сан Су Чигийн айлчлал хоёр орны хилийн ойролцоох асуудлыг шийдвэрлэх, хөндийрсөн харилцааг сэргээхийг зорьж байгаа хэмээн үзэж байна.
Нобелийн шагналт Ан Сан Су Чи Ардчиллын үндэсний намын тэргүүний хувьд ирэх 11 дүгээр сард болох Ерөнхийлөгчийн сонгуульд нэр дэвшинэ хэмээн хүлээгдэж байгаа юм.
Түүнийг БНХАУ-ын төрийн тэргүүнүүд хүлээн авч буй нь нөлөө бүхий удирдагч гэдгийг дэлхийн нийтэд харуулж байна.
Г.Үжин
