Их Британийн Хатан Хааны цэргийн албанд зүтгэдэг олон зуун балба цэрэг Хатан Хааны албанд зүтгэсэн 200 жилийн ойгоо тэмдэглэхээр цугларчээ. Лондон хотын Челси Эмнэлгийн гадна талбайд болсон арга хэмжээнд Хатан Хаан өөрийн нөхөр Хунтайж Филиппийн хамтаар оролцлоо хэмээн “Guardian” агентлагаас мэдээллээ.

Энэхүү арга хэмжээнд Гурха хэмээх цэргүүдийн хорооны захирагч цолтой Хунтайж Чарльз, Гурха цэргийн ангид багтаж Афганистанд хамт алба хааж байсан Хунтайж Харри нар оролцсон байна.

200 жилийн ойгоо тэмдэглэж байгаа Балбын цэргүүд саяхан Балба улсад болсон газар хөдлөлтийн үеэр амь насаа алдсан хохирогчдын гэгээн дурсгалыг хүндэтгэж нэг хором дуугүй зогсчээ.

Үүний дараа гурха цэргүүд Хатан Хааны өмнө байлдааны үзүүлэх сургалт хийсэн байна.

Их Британи улсын оролцсон томоохон хэмжээний дайн, тулаанд Балбын гурха цэргүүд хоёр зууны турш оролцсон юм. Дэлхийн нэг болон хоёрдугаар дайны үед 200000 гаруй гурха цэрэг Их Британийн төлөө тулалдаж, тэдгээрээс 43000 цэрэг амь насаа алдсан түүхтэй юм байна.