УИХ-ын гишүүн Х.Баттулгын намынхаа үндэсний зөвлөлдөх хорооны хурал дээр хэлсэн үгнээс нь иш татан нийтлэл бичсэний төлөө “Монголын үнэн” сонин шүүхэд дуудагдаад байгаа. Мөн Х.Баттулга гишүүн тус сониноос 100 сая төгрөгийн нэхэмжлээд буй.Харин уг асуудлаар өнөөдөр “Монголын үнэн” сониныхон мэдээлэл хийж, 2012 оны дөрөвдүгээр сарын 25-ны өдрийн дугаарт гарсан “Х.Баттулга: Н.Энхбаярын араас бусдыг нь явуулаач” нэртэй нийтлэл нь баримттай, үнэн нийтлэл бөгөөд мэдээллийнхээ эх сурвалжийг нууцлах нь бидний эрхийн асуудал гэлээ.
Мөн шүүхэд 100 сая төгрөгний нэхэмжлэл гаргасан нь хэвлэл мэдээллийн хэрэгслийг улстөр, эдийн засгийн цагдан хяналтад оруулах гэсэн оролдлого хэмээн үзэж байгаа аж. Тиймээс эрхэм гишүүний энэ үйлдлийн хариуд үнэн үг, үзгээрээ зэвсэглэдэг сэтгүүлчдийн жишгээр ажиллана. Ирэх даваа гаригт энэ нэхэмжлэлээ татан авахгүй бол таван үндэслэлээр Х.Баттулга гишүүнийг АТГ шалгуулах хүсэлт гаргана, мөн 17 чингэлэг спиртийн хэргээс эхлээд Худалдаа хөгжлийн банк, Мах Импекс компанийн хувьчлалын асуудал, сүүлд өргөн барьсан архи, спиртын үйлдвэрийн эздийг сонгуульд оролцуулахгүй байх тухай хуультай холбоотой шоуны талаар гээд олон баримтыг дэлгэх болно гэв.
