Дэд сайд болохоосоо өмнө өмссөн хувцас, унасан машинаараа олны ярианы сэдэв болдог байсан Н.Номтойбаяр сайдын суудалд морилсон ч бусдын хэл амнаас холдсонгүй. Түүнийг мөнгөөр зодож Нийгмийн хамгаалал, хөдөлмөрийн яамны сайд боллоо гэж хэвлэлээр нэг бичиж байв. Дараа нь МАН-аас УИХ-д нэр дэвших нь тодорхой болсон гэж хэд хоног бас “шуурав”. Өчигдөр л гэхэд тэрбээр УИХ-ын чуулганы үеэр УИХ-ын хоёр ч гишүүнээс хатуухан жавтий хүртлээ. Ирэх оны улсын төсөвт халамжийн бодлогыг хэрхэн тусгаж байгаа талаарх гишүүдийн асуултанд тэрбээр бүдэрч, баахан шүүмжлүүлсэн юм. Таван сар яамны ажил хийчихээд ажлаа мэдэхгүй байгаад нь ихэд бухимдсан С.Ламбаа гишүүн Н.Номтойбаярын оруулж ирсэн заалт нь “түүхий” байгааг хатуухан сануулж, буцааж татахыг шаардсан. Харин Сангийн сайд асан С.Баярцогт “Засгийн газрын гишүүн юм бол хэлэлцүүлэх гэж байгаа тоо, баримтаа ядаж хамгаалаад ярьчихдаг байх ёстой” гэв.
Ядаж байхад Т.Ганди сайд шинэ засаг бүрдмэгц Унгарт элчин суухаар сэтгэл нь эргэчихээд байгаа. Тиймээс “таван сартай” Н.Номтойбаяр шаварт унасан шарын эзэн гэгчээр энд, тэндхийн хуралд амаа асуулгаж байна. Өмнө нь Дэлхийн банкнаас зохион байгуулсан хуралд яамаа төлөөлөн очоод гадныхнхы элэг доог болсон тухай хөгтэй паян ч сонсогдож байлаа. Дэлхийн банкны төлөөлөгчид түүнийг “Юу ярьж байгаагаа өөрөө ч мэдээгүй байх. Монгол улс ийм хүнээр дэд сайд хийлгэх гэж” хэмээн халаглаж байсныг хэвлэлүүд бичиж байсан. Энэ явдлаас хойш нэг хэсэг Н.Номтойбаярын тухай сонирхолтой яриа намжиж байсан ч өнгөрсөн долоо хоногийн УИХ-ын чуулганаар П.Алтангэрэл гишүүн “МАК”-ын хүүгийн тухай яриаг дахин сэдрээсэн юм. Тэрбээр “Нийгмийн хамгаалал, хөдөлмөрийн дэд сайд Н.Номтойбаяр Дорнод аймагт хаваржиж байна. “Сонгуулиас өмнө нэг сая төгрөгийг бэлнээр өгнө” гэж яриад явж байгаа. Ажил хийлгэх гэж төрийн албанд томилсон юм уу, эсвэл Монголын хуулийг уландаа гишгэж улс төр хийгээд яв гэж дэд сайдын албанд томилсон юм уу” гэж нэлээд бухимдаж байсан. Энэ мэт өөрийнх нь эсрэг хатуу үг, ширүүн дайралтанд тэр болгон няцаалт өгөөд байдаггүй тул Н.Номтойбаяр энэ удаад ч үг дуугарсангүй. Дуугарсан ч дахиад өөрөө ороогдох тул чимээгүй хэлбэрээр “тэмцсэн” нь дээрч гэж зарим нь ярьцгааж байлаа. Хамгийн гол нь дэд сайд болсон таван сарын хугацаанд тав байтугай удаа ажилдаа тэнцэхгүй гэсэн утгатай шүүмжлэлд өртөөд байгаа Н.Номтойбаяр УИХ-ын сонгуульд нэр дэвших гэж байгаа нь олон хүний хор, шарыг малтаж байна. Зарим нь нэр дэвших тойрог олдохгүй урваж, шарваж, өрх тусгаарлаж байхад “МАК”-ын хүү ногоон гэрлээр парламентийн танхим руу зүтгэж байгаад эгдүүцэж байгаа юм. Тийм ч учраас Дорнод аймагт хамгийн нэр хүндтэй гэгдэх орон нутгийн бизнесмэн “Дорнод гурил” компаний захирал Х.Болорчулуун МАН-ын бага хурлын гишүүн хэрнээ бие даан нэр дэвшихээр гарын үсэг цуглуулж эхэлжээ. Н.Номтойбаярын энэ мэт үйлдлүүдэд нь олон улсын байгууллагынхан, орон нутгийн иргэд, одоо бүр парламентийн танхимд ч дургүйцэх хүн олон болсоор байна.
Х.Баярхүү
