Хөвсгөл аймагт нэр дэвшихээр гялалзаж явсан Д.Батхуягыг “аавынд” хийгээд арваад хонож байна. Түүнийг “Саус гоби сэндс” компанитай холбон шалгахаас гадна хоёр зуу орчим ашигт малтмалын лицензийг хууль бусаар сунгасан, олгосон гэх үндэслэлээр хорьж байгаа юм. Зарим эх сурвалж С.Баярт сануулга өгөхөөр шалгаж байгаа ч гэж тайлбарлаж эхэлсэн. Аль нь болох нь  удахгүй мэдэгдэх биз.

    С.Баярыг ерөнхий сайд байх үед АМГ-ын даргаар томилогдож хөлжсөн түүнийг ерөнхийлөгч асан Н.Энхбаярын хоригдож байсан өрөөнд хийсэн гэж нэгэн эх сурвалж мэдээллээ. Төв аймгийн урьдчилан хорих төв бол Монголын хамгийн зартай эрүүдэн шүүх газар гэж тодорхойлогчид олширсон. Харин энэ зартай газрын хамгийн гайгүй өрөөнд нь Н.Энхбаярыг хорьж байжээ. Н.Энхбаярын дараагийн “зочин” нь Д.Батхуяг болжээ. Уг өрөөний дотоод зохион байгуулалтыг олон хүн андахаа байсан. Учир нь Н.Энхбаярыг яллагдагчаар татах шүүхийн захирамжийг танилцуулах үед тэрээр яаж авирлаж байсныг Монгол даяараа харсан. Н.Энхбаярыг аяглаж, чихээ дарж, тойрон эргэлдэж байсан өрөө, тавилагуудаас олон зүйлийг анзаарч болно. Энэхүү алдарт өрөөнд Д.Батхуяг одоо шалгагдаж байна. Н.Энхбаярын ард түмэндээ хандаж захидал бичиж байсан өрөөнд харин Д.Батхуяг дарга чимээгүйхэн шиг сууж байгаа бололтой.

  Д.Батхуяг даргыг суллах эсвэл үргэлжлүүлэн хорихыг ирэх даваа гарагт шийдвэрлэнэ. Гэвч МАН түүнээс нүүр буруулж эхэлжээ. Учир нь түүний оронд Хөвсгөл аймагт нэр дэвших эрхэмийг хайж эхэлсэн сураг байна. Уг нь түүнийг “Эм-Си-Эс” группын дэд ерөнхийлөгч Л.Энх-Амгалангийн хамт Хөвсгөлд сойж байсан. Харин одоо Д.Батхуяг даргын оронд гурван хүнээс сонгохоор МАН-ын удирдлагууд ярьж байгаа аж. Тэр нь УИХ-ын гишүүн Ц.Даваасүрэн, Улсын бүртгэлийн даргаар ажиллаж байсан Б.Мөнхбаатар, Хөвсгөлийн бизнесмен, МАСЗХ-ноос гаралтай Ганболд нар аж.