Монгол Улсын 14 прокурор БНСУ-ын Олон улсын хамтын ажиллагааны байгууллага \КОЙКА\-ын шугамаар БНСУ-ын Эрх зүйн институтэд 2015 оны 5 дугаар сарын 28-наас 6 дугаар сарын 12-ны өдрүүдэд “Монгол Улсын эрүүгийн эрх зүй ба прокурорын албыг чадавхижуулах нь” сэдэвт сургалтанд хамрагдаад ирлээ.

Сургалтын хүрээнд “БНСУ-ын Эрүүгийн байцаан шийтгэх ажиллагаа, Прокурорын байгууллагын бүтэц тогтолцоо, Эрх зүйн боловсрол, Эрүүгийн хэргийн джитал мөрдөн байцаах ажиллагаа, Олон улсын эрх зүйн салбарт харилцан туслалцаа үзүүлэх” зэрэг 12 сэдвээр Эрх зүйн институтын багш нар хичээл зааж Солонгос улсын хуулийн байгууллагуудын үйл ажиллагааны талаар мэдээлэл  хийсэн ба сургалтын явцад Эрх зүйн институт болон Жинчон хот дахь тус институтын салбар төв, Засан хүмүүжүүлэх байгууллагын бүтэц зохион байгуулалт үйл ажиллагаатай танилцсан байна.

Эрх зүйн институтэд дэлхийн 88 орны 1440 хуульч урт болон богино хугацааны сургалтанд хамрагдсны гадна Монгол улсаас өмнө нь цагдаа, прокурор, гадаадын иргэн харъяатын алба зэрэг байгууллагын нийт 76 хуульч сургалтанд хамрагджээ.

БНСУ-ын Прокурорын байгууллага 1940 оны 8 дугаар сарын 2-нд байгуулагдсан бөгөөд бүтцийн хувьд Ерөнхий прокурорын газар, Сеүл, Пусан, зэрэг давж заалдах шатны 5 прокурорын газар, 18 дүүргийн прокурорын газар, 40 анхан шатны прокурорын газар гэсэн 64 нэгжтэй бөгөөд улсын хэмжээнд 2000 гаруй прокурор ажилладаг байна. Мөн прокуроруудын дэргэд мэргэжилтнүүд ч  ажилладаг байна.

БНСУ-ын прокурорын байгууллагын хувьд бие даасан, хараат бус нэгдмэл удирдлагатай байх зарчмыг удирдлага болгон ажилладаг бөгөөд зарим үйл ажиллагаа нь манай улсын прокурорын байгууллагын эрхлэн хариуцдаг ажилтай адил төсөөтэй боловч прокурор өөрөө мөрдөн байцаах ажиллагааг биечлэн явуулдгаараа онцлогтой.

Түүнчлэн эрүүгийн хэрэгт мөрдөн байцаалт явуулахдаа шинжлэх ухаан, техникийн ололтыг тухайлбал, ДНК-ын шинжилгээ хийх, гүйцэтгэх ажиллагаа явуулах, утсан холбоог чагнах, эрүүгийн хэрэгт иж бүрэн шинжилгээ явуулах, кибер гэмт хэргийг илрүүлэх зэрэгт онцгой анхаарч шинжлэх ухаан, техникийн хамгийн сүүлийн үеийн техник хэрэгслэлийг өргөнөөр ашиглаж байна.

Харин прокуроруудаа томилохдоо хуульчдын шалгалт өгч тэнцсэн хүмүүсээс сонгон шалгаруулж авдаг ба тухайн прокурор томилогдсон газраа 2 жилийн хугацаатайгаар ажиллаж дараа нь өөр газар ажилладаг ажээ. Тус улсын прокуроруудад нэгдүгээрт: гадаад хэлний мэдлэг, хоёрдугаарт: техник хэрэгслэл эзэмшсэн байдлыг гол шалгуур болгож томилдог байна.

Сургалтын явцад Монголын прокурорууд Пусан, Улсан, Гёнжу зэрэг хотод очиж Солонгос улсын хөгжлийн ололт амжилттай танилцсан байна.

Сургалтаар өгөгдсөн шинэ мэдээ, мэдээлэл, холбогдох материалыг нэгтгэж нийт прокуроруудад УЕПГ-ын дэргэдэх Прокурорын Сургалтын төвөөс сургалт зохион байгуулах юм.