Дөрвөн настай охиныг зодож амь насыг нь хөнөөсөн хэрэгт буруутгагдаад буй Г.Маралмаа, Т.Цогт нарыг шүүх хурал ШШГЕГ-ын харьяа цагдан хорих 461 дүгээр ангид өглөө 10.30 цагт эхэлж өдөржин үргэлжиллээ. Шүүх хурал өдөржин үргэлжилсний эцэст Т.Цогт, Г.Маралмаа нарын хэргийг нэмэлт мөрдөн байцаалтад буцаах шийдвэрийг шүүх бүрэлдэхүүн гаргав.

Харин шүүх хуралдааны үеэр хэн юу гэж мэдүүлсэн, яг ямар учраас хэргийг нэмэлт мөрдөн байцаалтад буцаав гэдэг олны сонирхолыг татаж байгаа юм. Тиймээс шүүх хуралдааны үеийн тэмдэглэлийг багцлан хүргье.

Хэргийг хоёр шалтгаанаар нэмэлт мөрдөн байцаалтад буцаасан юм.

 
Нэгдүгээрт, Г.Маралмаа Т.Цогтын эсрэг мэдүүлэг өгч "Т.Цогт охиныг нас бардаг өдрөөс хоёр хоногийн өмнө охиныг тэлээгээр ороолгож зодсон. Энэ нь үхэлд хүргэх шалтгаан болсон. Миний зодсон нь охиныг үхэлд хүргээгүй" гэж хэлсэн учир дээрх хэргийг дахин шалгах хэрэгтэй гэж үзжээ. Өөрөөр хэлбэл, Т.Цогтын тэлээгээр охиныхоо бөгсрүү цохисон нь үхэлд хүргэх шалтгаан болж чадсан уу гэдгийг нэмэлт мөрдөн байцаалтаар тогтоох юм.

 
Хоёрдугаарт, Т.Цогт, Г.Маралмаа нар охиныг өмнө нь дарамталдаг байсан нь үнэн эсэхийг мөн шалгах шаардлагатай. Учир нь Т.Цогтын эгчийнх нь охин Г.Маралмааг охиныг байнга дарамталдаг байсан гэж гэрчийн мэдүүлгээрээ өгсөн байдаг. Тиймээс гэрчийн мэдүүлгийг үнэн эсэхийг шалгаж тогтоох шаардлагатай байгаа юм.

Шүүх хуралдаан эхлээд удаагүй Г.Маралмаагийн бие өвдөж, мөн бага зэргийг цус алдаж 10 минутын завсарлага авав.

Улмаар шүүх хуралдаан үргэлжлэхэд шүүгдэгч Т.Цогт, Г.Маралмаа нар бие, биенийгээ буруутгасан мэдүүлгийг өгч эхэлсэн юм.

 
Г.Маралмаагийн хувьд "Т.Цогт охиныг нас бардаг өдрөөс хоёр хоногийн өмнө зодож, тэлээгээр ороолгосон. Мөн охин хоёр удаа шатнаас унасан. Энэ нь үхэлд хүргэх шалтгаан болсон. Харин би охиныг үхэлд хүргэх зүйл хийгээгүй" гэв.

 
Харин Т.Цогт "Г.Маралмаа бөөгийн зан үйл хийж,  миний охиныг байнга зоддог байсан. Өөрөөр хэлбэл, нүд амруу нь архи сүү цацаж, бөөгийн эд зүйлээрээ ороолгож, эхээсээ бузартаж хэмээдэг. Гэхдээ би Г.Маралмааг миний охины аминд хүрчихнэ гэж даанч бодсонгүй. Аминд хүртэл аюултай байна гээд намайг бөө болох ёстой гэж болгож байсан" гэв.

Тэгвэл насанд хүрээгүй гэрч охины хувьд Т.Цогтыг шөнийн ээлжинд ажилтай байх үед гэрт нь очиж Г.Маралмаа талийгаач охин хоёрт  хань болдог байсан аж. Гэрч охины хувьд Т.Цогтын эгчийнх нь охин гэнэ. Тэрбээр найман удаа тэднийд очиж хоносон гэдгээ хэлж охиныг Г.Маралмаагийн хавчилгад хэцүү байсан. Ихэвчлэн зодож, загнадаг байсан гэж мэдүүлсэн нь Г.Маралмаа удаа дараа ингэж зодсон уу гэх хардлагыг төрүүлж орхисон юм.

 Юутай ч охин өчигдрийн шүүх хуралд ирээгүй бөгөөд түүний өгсөн мэдүүлгийг шүүгч уншиж танилцуулсан юм.

Сэжигтэн Г.Маралмаагийн хувьд Т.Цогтыг ажилдаа явсан хойгуур байнга ямар нэг асуудал гаргадаг байсныг Т.Цогтын шүүх хурлын үеэр хэлсэн юм. Тодруулбал, шөнийн ээлжинд ажилтай байхад охин чинь тэгээд байна, өмдөндөө баачихлаа гэх мэтээр байнга шахуу залгаж, мессеж бичдэг байжээ.

Г.Маралмаагийн хувьд бүтэн өнчин бөгөөд дүү, эгчээс нь өөр ар гэрийнхэн бараг байхгүй аж. Харин өмгөөлөгчийнх нь хувьд Г.Маралмаагийн ялыг хөнгөрүүлэх үүднээс өчигдрийн шүүх хуралд оролцож байгаагаа онцолж байв.

Харин Т.Цогтын өмгөөлөгч үйлчлүүлэгчээ цагаатгах зорилготой шүүх хуралд оролцож байгаа хэлэв. Т.Цогтын хувьд Архангайд байдаг эгчийнхрүүгээ охиныг хааяа явуулдаг байсан байна.

 Харин нэг удаа явуулчихсан байхад нь төрсөн ээж нь мэдчихээд охиныхоо араас нь очжээ. Гэхдээ очихдоо охиныгоо Т.Цогтын төрсөн эгчид нь өргүүлэх талаар ярьж, гэрээ хүртэл хийхээр тохирч байсан гэдгийг шүүх хурлын үеэр хэллээ.

Мөн шүүгчдийн зүгээс охиноо харж хандаж чаддаггүй байсан талаар нь талийгаачийн ээж н.Өнөржаргалаас тодруулахад “Байнга хүүхдээ харах хэцүү байсан. Ажил төрөл хийж явахаас өөр аргагүй байсан. Надад өөр арга байгаагүй” гэдэг хариултыг өгсөн юм. Харин шүүгчдийн зүгээс ар өврөөрөө дүүрэн хүүхдээ суулгачихаад хүүхдүүдээ харж хандаж байгаа ээжүүд олон байна. Тэд хүүхдийнхээ мөнгөөр л амьжиргаагаа залгуулж байна гээд сууж байдаг шүү дээ. Гэтэл чамд охиноо өөр дээрээ байлгах боломж үнэхээр байхгүй гэж үү гэж талийгаачийн ээжээс асуув. Харин тэрбээр “Боломж байгаагүй” гэдэг хариултыг өгөв.

Шүүх хуралдаанд Г.Маралмаагийн гэр бүл болон охины төрсөн эхийн гэр бүлийнхэн хийгээд найз нөхөд оролцсон юм. Харин Т.Цогтын талаас  ганц хоёрхон хүн харагдаж байв. Шүүх хуралдаан эхнээсээ эхлээд л ширүүхэн байсан бөгөөд шүүгч нарч  оносон асуултуудыг шүүгдэгч болоод хохирогч охины ээжид тавьж байв. Ийн нэлээн ширүүхэн, бас бөгчим болсон шүүх хурал орой 17:30 цагийн үед өндөрлөж шүүх хуралд суусан хүмүүс хуралдааны танхимаас гарав. Энэ үеэр хохирогч охины ээжийн найз нөхөд, гэр бүлийнхэн нь Т.Цогт, Г.Маралмаа нарын ар гэрийнхнийг хүлээж байгаад Г.Маралмаагийн эгчийг гарч ирэнгүүт орилж, хашгичиж эхэлсэн юм.

Гэвч Г.Маралмаагийн эгч чихээ даран машиндаа сууснаар уг маргаан өндөрлөж, шүүгчдэгч, хохирогчийн ар гэрийнхэн ч өөр өөрсдийн машинд суун хөдөлцгөөсөн юм.

24tsag.mn