Хадгаламж, зээлийн хоршооны 8300 орчим хохирогчид хохирлыг нь барагдуулж өгөхийг Засгийн газар, Хууль зүй, дотоод хэргийн сайд Ц.Нямдоржоос шаардаж байгаа билээ. ХЗХ-ны хохирогч арав гаруй иргэн өнөөдөр Ц.Нямдорж сайдтай уулзана хэмээн Засгийн газрын ордны баруун хойд хаалгыг хаан суулт зарлаад байна.  Эдгээр иргэдийн хохирлын тал хувийг төрөөс барагдуулсан ч үлдсэн 27 тэрбум төгрөгийн хохирлыг нь гаргаж өгөхгүй байгаа аж. Энэ асуудлаар ХЗХ-ны хохирогчид удаа дараа Хууль зүй, дотоод хэргийн сайдад хандсан ч байнгын хороогоор хэлэлцсэнээс өөр тодорхой шийдвэр гаргаж өгөхгүй байгаа гэв.
   "Ирэх жилийн улсын төсвийн төсөөллийг хэлэлцэж байгаа энэ үед бидний мөнгийг хэрхэн олгох талаар ямар нэгэн шийдвэр гаргахгүй байгаагаас харахад энэ жил байтугай  ирэх жил ч хохирлоо төлүүлж чадахгүй юм шиг байна" гэж суулт зарлаж байгаа иргэд хэлж байлаа. Тиймээс ХЗХ-ны хохирогчид Ц.Нямдорж сайдыг уулзаж, тодорхой хариу өгтөл өдөр болгон Төрийн ордны гадаа ирж суулт зарлана гэсэн юм.