МАХН-ын дарга Н.Энхбаярыг АТГ-аас баривчилж, хорьсон нь олон нийтийг хоёр хэсэгт хуваан талцуулаад байгаа билээ. Зарим нь Н.Энхбаярт хүнлэг бус хандлаа, улс төрийн хэлмэгдүүлэлт хийж байна гэж үзэж байгаа бол зарим хүн АТГ хуулийн дагуу ажлаа хийж байна хэмээн дүгнэж байгаа. МАХН-ын зүгээс хуулийн байгууллагынхныг эрс буруушаасан мэдэгдэл удаа дараа хийсэн. АТГ ч өөрсдийн байр суурийг цаг тухайд нь илэрхийлж байв. Харин өнөөдөр ШШГЕГ-аас Н.Энхбаярын Төв аймгийн урьдчилан хорих төвд байхдаа ёс зүйгүй аашилж байсан тухай бичлэгийг хэвлэл, мэдээллийн хэрэгслүүдэд тараалаа. Энэ бичлэг дээр ерөнхийлөгч асан Н.Энхбаяр хуулийн байгууллагын ажилтнуудын өмнөөс хоёр ч удаа салаавч гаргаж, бүдүүлэг аашилсан нь бичигдсэн аж.

   Тэрбээр өөрийг нь эмчлэхээр үзлэг хийх гэсэн Хоёрдугаар нэгдсэн эмнэлгийн дарга, эмч Г.Баясгаланд хандан “Монгол улсын ерөнхийлөгч байсан хүн чинь чамайг дуудаж байна” хэмээн орилж, хашгичин заамдаж авчээ. Энэ мэт бүдүүлэг үйлдэл гаргаж байсан бичлэгийг нь ШШГЕГ-ын дэлгэснээр 24tsag.mn тун удахгүй тавих болно.