Улсын Их Хурлын дарга З.Энхболд Баянзүрх дүүргийн 8,16 дугаар хорооны гэр хорооллын дахин төлөвлөлтийн төслийн хэрэгжилт, барилгын ажлын явц байдалтай танилцсаны дараа “Бест шүес” ХХК-ын үйлдвэрт зочлон үйлдвэрийн үйл ажиллагаа, бүтээгдэхүүний дээжтэй танилцлаа.

“Бест шүес” гутлын үйлдвэр нь 15 дахь жилдээ үйл ажиллагаагаа явуулж байгаа бөгөөд 2014 онд Шинэчлэлийн засгийн газраас гаргасан Чингис бонд 888 төслөөс 2 тэрбум төгрөгийн зээл авч өдөрт 500-700 хос гутал үйлдвэрлэх хүчин чадал бүхий конверийн шугамтай үйлдвэрээ нээж ашиглалтанд оруулсан байна.

Ингэснээр зах зээлд технологийн дагуу үйлдвэрлэсэн чанартай, үнэ хямд гутлыг зах зээлт гаргах бүрэн боломжтой болж байгаа аж. Үүний тулд тус үйлдвэрт хангалттай эргэлтийн хөрөнгө болон ялунгаяа бөөнөөр үйлдвэрлэх гутлын захиалгат ажил хэрэгтэй байгаа бөгөөд тус үйлдвэрийн хувьд төрөөс бэлэн мөнгө хөрөнгөөр дэмжүүлэхээс илүүтэй хийж гүйцэтгэх ажлаар хангах дэмжлэг хэрэгтэй байгааг тус компанийн захирал Б.Түвдэнням хэлж байлаа.

Мөн тэрээр үйлдвэрлэлийн үйл ажиллагаанд тулгамдаж байгаа асуудлын талаар Улсын Их Хурлын даргад өөрийн санал бодлоо дуулгасан юм. Тухайлбал, тендерийг дотоодын үндэсний үйлдвэрүүдэд давуу эрхтэйгээр өгөх, төсвөөс санхүүжиж байгаа цэрэг, цагдаа, хууль хүчний байгууллагын гутал, төрийн өмчийн үйлдвэр аж ахуйн газрын хөдөлмөр хамгааллын гутал, хувцасны тендерийг сонгон шалгаруулж, шаардлага хангасан дотоодын үйлдвэрүүдэд давуу эрхтэйгээр өгөх асуудлыг хуулиар зохицуулж өгөхийг хүслээ.

Түүнчлэн үйлдвэрлэн гаргаж байгаа бараа, бүтээгдэхүүнд оногдож байгаа одоогийн 10 хувийн татвар жижиг, дунд үйлдвэрүүдийн хувьд өндөр байгааг хэлж татварын хувь хэмжээг багасгах шаардлага зайлшгүй тулгарч байгааг хэлсэн юм.

Мөн тус үйлдвэрийн хувьд мэргэжилгүй хүмүүсийг өөрсдөө сургаж, дадлагажуулан ажиллуулахад нэгээс хоёр жил шаардагддаг бөгөөд тухайн сургасан ажилчин нь өрхийн үйлдвэрлэл эрхэлж хувиараа ажиллахаар ажлаас гараад явдаг. Иймд техник, мэргэжлийн сургуулиудад мэргэжлийн ажилчин бэлтгэх нэн шаардлагатай байгааг дуулгалаа.

Улсын Их Хурлын дарга З.Энхболд хэлэхдээ, “Бид “Бест шүес” гэдэг хамгийн сайн гутал хийдэг үйлдвэр дээр ирээд байна. Энэ үйлдвэр “Чингис” бондоос 2 тэрбум төгрөгийн зээл аваад ажлын болон гоёлын гутал гээд бүхий л төрлийн гутал хийж байна.

Яг ийм бодитой үйлдвэрлэлд хөрөнгө оруулснаар импортын орлуулж бодитой ажил хийж байгаа хүмүүсийг дэмжиж байгаа. Японтой хийсэн чөлөөт худалдааны хэлэлцээрийн дагуу эдний бүтээгдэхүүн Япон руу гарах гэж байна. Ийм зорилгоор хөрөнгө оруулалтын мөнгийг зарцуулах ёстой байсан түүний дагуу ажил явж байна.

Өчигдөр Улсын Их Хурлаар Төрөөс аж үйлдвэрийн талаар баримтлах бодлого батлах тухай тогтоолын төсөл батлагдсан. Үйлдвэрлэлийг дэмжих тухай болон холбогдох бусад хуулийн төслүүдийг анхны хэлэлцүүлэгт шилжүүлсэн. Жишээ нь эдний үйлдвэрлэсэн гутлыг үнэтэй байсан ч монголдоо хийсэн бол худалдаж авна гэсэн үг. Энэ компанийн зүгээс нэг жил тендерт оролцоод шалгарч болж байна.

Гэхдээ дараа дараагийн жилд ийм захиалга байх уу үгүй юу гэдгээ мэдэхгүй байгаа учир үйлдвэрлэлээ өргөжүүлж чадахгүй байна гэж байна. Иймд дотоодын үйлдвэрлэлийн бүтээгдэхүүнийг худалдаж авдаг тендерийнхээ хуулийг бид өөрчилж олон жилээр тав, арван жилээр хийдэг өөрчлөлтийг тусгах гэж байгаа.

Иймд энэ өөрчлөлтүүдийг хийж дотоодын үйлдвэрлэлээрээ тоног, төхөөрөмжөө шинэчлэхэд нь “Чингис” бондоор тусалсан бол одоо зах зээл дээр нь туслах зорилгоор үйлдвэрлэлийг дэмжих зорилготой Улсын Их Хурлын тогтоол, шийдвэр гарч байгаа. Удахгүй эдгээр үйлдвэр шиг үйлдвэрүүдийн хүсэлтээр дотоодоо хийж болж байгаа бүтээгдэхүүнээ олон жилээр гэрээлдэг болох зам руу орох нь зүйтэй ” гэв.

Мөн Улсын Их Хурлын дарга З.Энхболд өнөөдөр /2015.06.20/ Төв шуудангаас баруун тийш Нарантуул зочид буудал хүртэлх замын доогуур явж байгаа дулааны шугамыг шинэчилж өргөтгөх ажлын явц байдалтай танилцсан юм. 1,7 км замын доогуур явж байгаа шугам хоолой хуучин 300-гийн хэмжээтэй байсныг 500 болгон өргөтгөж байгаа юм байна.

Шугам хоолой солих ажил гурван үе шаттай хийгдэж байгаа бөгөөд эхний ажил маргааш дуусч, хоёр дахь шатны ажил 7 дугаар сарын 5-нд, гурав дахь шатны ажил нь 8 дугаар сарын 15-нд дуусахаар төлөвлөгдөөд байгаа аж.

Газар доорх шугам сүлжээг шинэчлэхдээ тунель барих шийдлийг хэрэгжүүлж байгаа нь жил бүрийн зун шугам хоолой солих ажлын хүрээнд зам дагуух газрыг ухаж сэндийлж иргэдийн бухимдлыг төрүүлэхгүй болох ач холбогдолтой юм байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.