АМГ-ын удаа дараагийн удирдлагуудыг, зарим газар хэлтсийн дарга нарыг АТГ-аас цагдан хорьж шалгаж эхэлж байна.
    Эдгээр эрхэмүүдийг хууль бусаар 200 орчим лицензийг сунгасан, олгосон гэх хэрэгт сэжиглэсэн юм. Уг лицензүүдийн ихэнх нь гадаадын хөрөнгө оруулалттай компаниуд байгаа сурагтай. Үүний зэрэгцээ 2003 онд “Айвенхоу Майнз” компанид нэгэн зэрэг 40 гаруй лиценз олгосон шалтгаан, үндэслэлийг ч тогтоохоор ажиллаж эхэлжээ. Энэ хэргүүд ихээхэн дуулиан дэгдээхийн зэрэгцээ цөөнгүй хүнийг хөлдөө чирч эхлэх бололтой.
    Одоогийн байдлаар АМГ-ын дарга Д.Батхуяг, АМГ-ын даргын үүрэг гүйцэтгэгч М.Ариунбаяр, АМГ-ын Геологи уул уурхай кадастарын дарга Л.Даваацогт зэрэг албаны 4-5 хүнийг хорьж шалгаж эхэлсэн. Харин хувийн компанийн хичнээн удирдлага шалгагдаж байгааг хэн ч мэдэхгүй. Мөрдөн байцаалтын нууц.

    Үүнтэй холбогдуулан 200 орчим лиценз авсан компанийн захирлуудыг АТГ-аас ганц нэгээр нь ээлж дараалан шалгаж байна. Тэдний зарим гадаад захирлуудыг монголын хилээр гарч явахыг нь ч хоригложээ. Хэрэв энэ мэдээлэл үнэн бол гадаадын хөрөнгө оруулалттай аж ахуйн нэгжүүдэд ихээхэн асуудал байгаа бололтой. Нэг бус нилээд хэдэн аж ахуйн нэгжийн гадаад удирдлагад ийм арга хэмжээ авч эхэлсэн бололтой.
Ийнхүү нэг хэсэг Монголын уул уурхай, газар шорооны төлөө тэмцэлдэж байсан гадаадын зарим хөрөнгө оруулагчдыг АТГ-ынхан шалгаж эхэлжээ. Тэдэнд багагүй асуудал бий гэж өнөөг хүртэл хэвлэл мэдээллийн хэрэгслээр бичигдсээр ирсэн билээ.
   АТГ-ын уул уурхайн лицензийн төлөөх шалгалт Монгол захирлуудыг ч гэсэн анхаарлын гадна үлдээхгүй байгаа гэнэ. Монголын компаниудын хууль бусаар авсан гэж үзэх лицензүүдийг нэг бүрчлэн шалгаж, дүгнэлт өгч байгаа аж. Зарим эх сурвалжийн мэдээлснээр бол хууль бусаар лиценз авсан гэгдэх компаниудын захирлууд ам алдаж мэдэхээр байгаа гэнэ. Харин АМГ-ын удирдлагууд одоогийн байдлаар ямар нэгэн буруутай үйлдэл хийгээгүй гэсэн байр суурин дээрээ хатуу зогсож байгаа аж.
    Уул уурхайн лицензийн төлөөх зах замбараагүй, хяналтгүй өрсөлдөөнд холбогдох байгууллагууд хяналтаа тавихаар ийнхүү ажиллаж эхэллээ. Энэ том сүлжээ задран унаж, уул уурхай дагасан бизнест олон хүн орооцолдон “аавынх”-руу ачигдах цаг ирж байж мэдэхээр байна. Тиймээс АТГ-ынханыг ард түмэн ажлаа сайн хийж байна хэмээн үнэлж эхэллээ.