Байгаль орчин, аялал жуулчлалын яамны “Нээлттэй хаалганы өдөр” энэ сарын 22-нд буюу ирэх мягмар гаригт 14.00-18.00 цагт Сүхбаатарын талбайд зохион байгуулагдана. “Нээлттэй хаалганы өдөр”-т БОАЖЯ, түүний харьяа агентлагууд, үндэсний хороод, төсөл хөтөлбөрүүд өөр өөрсдийн чиглэлээр өнгөрсөн дөрвөн жилийн хугацаанд хийсэн ажлаа олон нийтэд дэлгэн танилцуулах аж. Мөн байгаль орчин, аялал жуулчлалын салбарын бүх нэгжийн бодлого, зорилтын хэрэгжилтийн танилцуулга мэдээлэл, сургалт сурталчилгаа нээлттэй явагдаж, тухайн салбаруудад ашиглаж буй техник, тоног төхөөрөмжүүдийг олонд танилцуулж, зарим сонирхолтой туршилт хэмжилтүүд явуулахаар болжээ.
• Усны явуулын лаборитори, газрын доорх усны мониторингийн тоног төхөөрөмжийн үзэсгэлэн,
• Ойжуулалт, ойн хортон шавж, түймэр, хүний хууль бус үйл ажиллагааны тэмцлийн ажлын техник, мод үржүүлгийн тарьц суулгац, хүлэмж, трактор, услалтын систем,
• Цаг уур, орчны шинжилгээ, байгаль орчны мэдээллийн үйлчилгээний төхөөрөмжүүд, тэр дундаа цаг агаарт зориудаар нөлөөлөх үйл ажиллагаанд ашиглаж буй тоног төхөөрөмж, цаг агаарын автомат станц, агаарын бохирдлын явуулын лаборитори зэрэгтэй нэг дороос танилцах боломжтой.
Түүнчлэн БОАЖЯ-ны дэмжлэгээр бүтээгдсэн эко 00, түлшний хэмнэлттэй бүрэн шаталттай сайжруулсан зуух, монгол гэрийн дулаалга, гэрийн үүдний амбаар, хагас коксжуулсан нүүрс, бусад түлш, хийн халаагуур, хогны машин, дуобус автобус гэх зэрэг монгол хүний ур ухаан шингэн бүтсэн шилдэг бүтээлүүдийг дэлгэн танилцуулах аж.
Мөн аялал жуулчлалын зуны улирлын брэндийн танилцуулга, гар урлалын бүтээгдэхүүн үйлдвэрлэгчдийн бүтээгдэхүүний сурталчилгаа, БОАЖ-ын салбарт олон улсын байгууллага, хандивлагч орнуудын тусламжаар хэрэгжүүлж буй төслүүд, байгаль орчны төрийн бус байгууллагууд, улсын тусгай хамгаалалттай газруудын хамгаалалтын захиргаадын үйл ажиллагааны төрөлжсөн танилцуулга мэдээлэл нээлттэй байна.
Дээрх салбаруудын бодлогыг танилцуулсан төрөлжсөн гарын авлага материалууд, сургалтууд, байгаль, түүний баялгийн тухай, зүй бус ашиглалтын үр дагаврын тухай баримтат кино бүтээлүүдийг ч нийтэд хүргэнэ.
Түүнчлэн БОАЖ-ын салбарын “Нээлттэй хаалганы өдөр”-т хүрэлцэн ирсэн иргэд, зочдод “Алтан ураг”, “Монгол эгшиглэн” хамтлагууд уран бүтээлийн дээжээ, Торго салоныхон хувцасны үзүүлбэрээ толилуулахаар болжээ.
