Хувь заяаны тоглоом, шоглоом заримдаа тохуутай юм. Учир МАН-ын (МАХН хуучнаар) дарга байсан, энэ намын өмнөөс ерөнхий сайд, УИХ-ын дарга, ерөнхийлөгч болж байсан хүнийг яллах өдрийг тооцоолон байж сонгожээ. Одоогоос 14 хоногийн өмнө МАН 5 дугаар сарын 24 өдөр бага хурлаа хийж, 2012 оны УИХ-ын сонгуульд нэр дэвших шилдэгүүдээ тодруулна гэж зарласан. Гэтэл яг энэ өдөр дарга нь байж, удирдаж явсан, алдаа оноотой, алдар гавъяатай Н.Энхбаярын шүүх хурал болж түүнийг яллах гэнэ. Ард түмэнд яаж харагдаж, хэрхэн ойлгогдох бол оо? Хөндлөнгийн ажиглагчдын хэлж байгаагаар  Н.Энхбаярт ял өгөх нь тодорхой аж. Тиймдээ л сонгуулийн өмнө яаран сандран шүүхийн тогтоол унших гэнэ.

   Удирдлагад нь ажиллаж байсан хүмүүс УИХ-ын сонгуульд нэр дэвшин баяр хөөртөө бялуурч байх үед, удирдагч нь байсан эрхэмд ял өгөөд шорон руу ачина гэдэг маш эвгүй сценари л даа. Ийм учрал тохиол гэж байхгүй. Харин ийм үйл явдлыг зориуд зохион байгуулан хийдэг юм. Хэн үүнийг зохион байгуулж, гардан удирдаж байна вэ гэдэг анхаарал татаж байна. Тэгэхээр Н.Энхбаярыг яллах гэж хэн улайрч, хэн эрүү үүсгэсэн бэ? Тэд аль намын гарал угшилтай вэ гэдгийг ард түмэн мэдэж байгаа. МАН, АН-ын сонгуулийн өмнөх томоохон “зодоон” ингэж эхлэх гэж байна.

    МАН бол өөрсдийнх нь хэлдэгээр Монгол улсын 90 гаруй жилийн алдаа оноотой холбоотой. Оносон нь их байгаа учраас ардчиллын 20 жилийн 16-д нь дангаараа болон хамтарсан байдлаар засгийг удирдаж ирсэн. Гэвч энэ намын олон удирдлагыг социализмын үед хороосон гашуун түүх бий. Тиймээс л МАН-ынхан бид ард түмнээ хэлмэгдүүлээгүй, тусгаар тогтнолоо авч үлдэхийн тулд манай нам ч гэсэн хэлмэгдэж байсан гэж хэлдэг юм.

   МАН-ын удаа дараагийн удирдлагуудыг орос ах нар хөнөөсөн. Тэгэхдээ дандаа монголчуудын үндэсний баярыг тохиолдуулан цааш нь харуулсан харамсалтай түүх байдаг. Мэдээж Орос ах нар монголчуудыг наадаж байх өдөр удирдлагуудыг нь хороохдоо сайн тоцоож төлөвлөсөн байж таараа. Ихэвчлэн 7-р сарын 11 эсвэл 11-р сарын 26-ны өдөр Монголын сайхан хөвгүүд эх орныхоо төлөө явцгаасан. Энэ өдөрүүдэд харин ард түмэн удирдагчидаа хөнөөснийг мэдэхгүй баярлан цэнгэдэг юм. Өөрөөр хэлбэл монголчууд баярлан цэнгэж, наадаж байхад удирдлагуудад нь цаазын ял өгч байсан гашуун түүх бий. Монголын хамгийн том хоёр баярын өдөр олон сайхан аавын хөвгүүдийг авч оджээ. Ийм танил сценари орчин үед өөр хэлбэрээр хэрэгжиж мэдэхээр байна.

   МАН-ынхан 2012 оны сонгуульд нэр дэвшигчдээ орон даяар зарлаж, Чингэсийн болоод Д.Сүхбаатарын хөшөөнд хүндэтгэл үзүүлж, Тусгаар тогтнолын ордондоо оргилуун дарс буудуулж байх агшинд удирдагч нь, туг нь явсан Н.Энхбаярт ял өгөх нь ард түмэнд яаж харагдах бол оо? Эсвэл МАН-ынхан Н.Энхбаярт ял өгөх өдөр нэр дэвшигчдээ тодруулсан ч гэсэн урьдын адил баярлан цэнгэхгүй, дүнсгэр байх болов уу? Бүр Н.Энхбаярт ял өгөхийг эсэргүүцэх болов уу? Нэр дэвшүүлэх хурлаа өөр өдөр болгох болов уу? гээд олон асуудал урган гарлаа. Нэр дэвшүүлэх хурлаа өөр өдөр болгон өөрчилвөл Н.Энхбаярыг шүүх өдрийг бас өөрчлөн тэр өдөр нь тааруулбал яах вэ? Эдгээр асуудлууд МАН-аас ухаантай нүүдэл шаардаж байна.