Өнгөрсөн баасан гаригт Хан-Уул дүүргийн шүүхэд УИХ-ын гишүүн Х.Баттулгын нэхэмжлэлтэй ХЗДХЯ-ны сайд Ц.Нямдоржид холбогдох шүүх хурал болж, Ц.Нямдорж сайдыг бусдыг гүтгэсэн хэмээн үзсэн билээ. Анхан шатны шүүхийн шийдвэр Х.Баттулгын талд гарснаар, Ц.Нямдорж сайд Х.Баттулга гишүүнээс уучлал гуйхаар болсон юм. Гэвч тэрээр анхан шатны шүүхийн шийдвэрийг эсэргүүцэн, давж заалдах шатны шүүхэд хандах болсныг түүний ойрын эх сурвалж мэдээлэв. Хууль зүй, дотоод хэргийн сайд Ц.Нямдорж сайд АН хамтарсан Засгийн газраас гараад удаагүй байхад УИХ-ын гишүүн Х.Баттулгыг ЗТБХБ-ын сайд байхдаа солонгос, хятадуудтай төмөр зам барих тухай нууц гэрээ хийсэн хэмээн мэдэгдэж байсан юм. Энэ гэрээг Засгийн газар, харьяа яам нь ч мэдэхгүй байсан тухай сүр дуулиантайгаар олон нийтэд мэдээлж байв. Түүгээр ч барахгүй яамны удирдах ажилтнуудыг хүртэл Төрийн ордонд цуглуулж, Х.Баттулга гишүүн нууц, хууль бус гэрээ хийсэн гэдгийг нотлуулахаар зүтгэж байсан билээ.
Тэрээр “2011 оны гуравдугаар сарын 19-нд Х.Баттулга нууцаар Солонгос, Хятадын хамтарсан групптэй байгуулсан “Төмөр зам барих нууц гэрээ”-г мэддэг хүн Монголд бараг байхгүй. Ямар учиртай юм бэ гээд хууль зүйн талаас нь шалгах гэхээр ийм гэрээ байгуулаагүй гэж худлаа хэлээд материалыг нь өгөхгүй байна. Энэ улсуудтай уул уурхайн лицензийг барьцаалж гэрээ хийж байх үед Хятад улсын холбогдох яамны хүмүүс ирж санамж бичигт гарын үсэг зурсан. Хятадын салбарын дэд сайд нь Бээжингийн онгоцны буудал дээр буухад өчигдөр зурсан санамж бичиг чинь хүчингүй шүү гэж Монголын талаас мэдэгдсэн. Энэ мэт хууль бус ажлаас нь болж Таван толгой гацчихаад байна. Гэтэл сүүлд нь төмөр замын ажил Ц.Нямдоржоос болж гацаж байна гэж мэдэгдэж байгаа нь буруу” гэсэн юм.
Харин үүнийг Х.Баттулга гишүүн тухайн үед нь эрс няцаан үгүйсгэж, Хууль зүй, дотоод хэргийн сайд Ц.Нямдоржийг өөрийг нь гүтгэн доромжилж, нэр төрд халдсан гэж Хан-Уул дүүргийн шүүхэд хандаад байсан билээ. Ийнхүү анхан шатны шүүхийн шийдвэр Х.Баттулгын талд гарснаар Ц.Нямдорж гишүүн нэлээн эвгүй байдалд ороод байгаа юм. Хэрвээ тэрээр давж заалдах шатны шүүхэд ялагдвал хяналтын шатны шүүхэд хандах боломжтой юм. Гурван шатны шүүхийн шийдвэр УИХ-ын гишүүн Х.Баттулгын талд гарвал Ц.Нямдорж сайд Х.Баттулга гишүүнээс уучлал гуйхаас өөр аргагүйд хүрэх бололтой.
Саяхан МАХН-ын дарга Н.Энхбаярыг баривчлах үеэр “унтаж байсан” гэх хариулт өгснөөрөө сайдын суудлаасаа огцрох дөхсөн Ц.Нямдоржид одоо түүнээс ч том асуудал бий болоод байна. УИХ-ын сонгуульд нэр дэвшихээр зэхэж байгаа түүнд Х.Баттулгын асуудал том бул хар чулуу болж тээглэх нь ээ. Тэгээд ч хууль хэрэгжүүлэх ёстой гол хүн нь хуулиа зөрчсөн гэж шүүх дүгнэж байгаа нь багагүй асуудал үүсгэж эхлээд байгаа юм.
/24tsag.mn/
