70 сая жилийн настай Тиранозаурус Батаарын бүтэн шахуу араг ясыг АНУ-ын Нью-Иорк хотод дуудлага худалдаагаар зарах гэж байгаа тухай мэдээлэл өнгөрсөн амралтын өдрүүдэд нийтийн анхаарлын төвд байсан. Монголын улсын ерөнхийлөгч Ц.Элбэгдорж энэ асуудлаар Даллас хотын шүүхэд нэхэмжлэл гаргаж, дуудлага худалдаа зохион байгуулж байгаа “Хэритэж Аукшион” байгууллагатай зарга үүсгээд байсан. Тиймээс дуудлага худалдааг 10 хоногоор хойшлуулсан гэж Ерөнхийлөгчийн Тамгын газраас мэдэгдэж байсан. Гэвч өнөөдөр “Херитейж Аокшн”-ы албан ёсны сайт болох www.ha.com сайтад уг олдворыг зарсан тухай мэдээлэл гарчээ. Араг ясыг хэсэглэн хуваалгүй, бүхлээр нь зарсан бөгөөд дуудлага худалдаагаар 2.63 сая доллар хүрсэн байна.

   Өчигдөр Ерөнхийлөгийн Тамгын газрынхан хэрэв “Хэритэж Аукшион” Монголын гэх энэ түүхийн үнэт олдворыг зарвал цагдаагийн хүчээр зогсоох боломжтой гэж мэдэгдэж байв. Гэсэн ч Нью-Иорк хотод үйлчилж байгаа хуулийн дагуу дуудлага худалдааг хойшлуулах бол хамгийн багадаа 48 цагийн өмнө хүсэлтээ илгээх ёстой аж. Тиймээс “Хэритэж Аукшион”-ынхон дуудлага худалдааг хуулийн дагуу болсон гэж тайлбарлаж байгаа аж.
    Тиранозаурус Батаарын араг яс зарагдсан талаарх мэдээлэлд нэмэлт болгон тус байгууллагын ерөнхийлөгч Грег Рохан “Энэ олдворыг хууль ёсны дагуу Америкт орж  ирсэн, дуудлага худалдаа хуулийн дагуу явагдсан гэдгийг бид батална. Одоогоор бидэнд энэ үлэг гүрвэлийн араг яс Монголынх гэсэн баталгааг тус улсын Засгийн газраас өгөөгүй байгаа. Энэ бүхэн АНУ-ын хуулийн дагуу шийдэгдэх болно” гэж мэдэгдсэн байна.  

   Гэхдээ Тиранозаурус Батаарын олдвор Монголынх гэдгийг олон эрдэмтэд баталж, Монгол руу буцаахыг дэмжиж байгаа билээ. Калифорни хотод амьдардаг плантелогич Нилл Келли өөрийн хүсэлтээр сайт нээж, түүгээрээ дамжуулж уг үлэг гүрвэлийн ясыг Монголд аваачихыг дэмжиж байгаа 1000  хүний гарын үсэг цуглуулахаар ажиллаж байгаа. Мөн монгол эрдэмтэн Н.Болорцэцэг ч манай орны олдвор гэдгийг нотлохоор олон улсын эрдэмтэдтэй хамтран ажиллаж байна. “Херитейж Аокшн”-ы өмнө Нью-Иорк хотод амьдардаг монголчууд мөн эсэргүүцлийн жагсаал хийсэн. Шүүхэд нэхэмжлэл гаргасан байгаа тул Монгол орны түүхийн олдвор гэдгийг сайтар баталж чадвал нутагтаа авчрах найдвар байгаа гэж үзэж байна.