БСШУЯ, БНХАУ-ын Боловсролын яам хоорондын “Монгол Хятадын тусгай хөтөлбөр хэрэгжүүлэх тухай санамж бичиг”-ийн дагуу 2015-2016 оны хичээлийн жилээс бакалавр, магистр, докторын сургалтад 1000 оюутан суралцахаар болсон. Эдгээр оюутны эхний ээлж болох 150 оюутанд тэтгэлгийн урилга гардууллаа.

Энэхүү ёслолын ажиллагаа өнөөдөр БСШУЯ-нд болов.

БСШУ-ы дэд сайд Б.Тулга хэлэхдээ, “Тэтгэлэгт хөтөлбөрийн шалгуур үзүүлэлтэд Монгол Улсын Засгийн газрын тэтгэлгээр суралцах ерөнхий зарчмыг барьж байна. Үүн дээр нэмээд хятад хэлний анхан шатны мэдлэгтэй байх шаардлагатай. Тиймээс Монгол Улсын төрийн их, дээд сургууль, зарим дунд сургуулийн дэргэд хятадаас багш урин, курс хичээллэж байгаа. Тухайлбал, Күнзийн институт ЧД-ийн 23 дугаар сургууль, МУИС, МУБИС-ийн дэргэд бий.  Энэ жил ШУТИС, ХААИС-ийн дэргэд Кунзийн иниститутыг шинээр нээнэ. Үүгээр дамжуулан манай оюутан залуус хятад хэлний анхан шатны бэлтгэлээ хийхээс гадна, магистр, докторын хөтөлбөрт сурахад бакалаврын голч оноо нь 3 ба түүнээс дээш бол энэ эрхийг авах боломжтой” гэв.

Энэ хичээлийн жилд 20 оюутан бакалаврт мэргэжлийн чиглэл харгалзахгүй, 96 магистр, 35 доктор боловсрол судлал, урлагийн ухаан, геологи, барилга байгууламж, уул уурхай, газрын тос ба байгалийн хий, мал эмнэлэг зүй, мал аж ахуй, газар тариалан зэрэг мэргэжлээр суралцах юм.

Тэтгэлэгт шалгарсан оюутан Н.Сайнням, “Бээжингийн Багшийн их сургуульд магистрт сурна. Энэ тусгай хөтөлбөрийн хүрээнд санхүүгийн хүндрэлтэй оюутнууд хамрах боломжтой. Сургалтын төлбөр, дотуур байр, оюутны сар бүр олгох тэтгэмж багтсан. Тээврийн зардлыг өөрсдөө даана. Дипломны голч дүн, тухайн төгссөн мэргэжлээрээ ажилласан жил гэсэн шаардлагыг эхний шатанд хангаж хоёрдугаар шатанд ярилцлага өгсөн. Ярилцлагыг монгол, англи, хятад  хэлээр авсан. Нэг жил хэлний бэлтгэлд суралцана" гэв.

Санамж бичгийн хүрээнд энэ хичээлийн жилээс эхлэн 5 жилийн хугацаанд нийт 1000 оюутан БНХАУ-ын Засгийн газрын тэтгэлгээр суралцана. Сонгон шалгаруулалтыг жил бүрийн хавар талууд хамтран зохион байгуулах юм.