Нийслэлийн хогийг багасгах, цэглэх асуудлаар олон төсөл хөтөлбөрүүдийг шат дараатайгаар боловсруулж хэрэгжүүлдэг ч бодит үр дүнд хүрдэггүй байсан. Тэгвэл сүүлийн үед иргэд хогны асуудалд ихэд анхаарч, сайн дураарай хог цэвэрлэх аян өрнүүлж гол ус, байгаль дэлхий, өөрсдийн эрүүл мэндийг аврахын тулд хичээн зүтгэдэг болжээ.

Сайн дурын үйлсэд хөгшин залуу, эрэгтэй, эмэгтэй гэлтгүй зүтгэдэг болсон нь талархууштай юм. Мэдээж сайн дурын ажилчид дунд орчин тойрноо тодорхой хэмжээний мөнгөөр цалинжин цэвэрлэж буй иргэдч багтах юм.

Нийслэлээс иргэдийг оршин суугаа орчныхоо хогийг цэвэрлэснийх нь төлөө цалинжуулж урамшуулах ажлыг зохион байгуулаад байгаа. Энэ ажил хэр ахицтай байгааг хүмүүс төдийлөн мэдэхгүй байгаа. Гэвч нөгөөтэйгүүр уг саналыг нааштайгаар хүлээж авч гар бие оролцон хоггүй Улаанбаатарын төлөө тэмцэж байгаа иргэд ч нэмэгдсээр байгааг хорооны ажилчид онцолж байна.

Тиймээс бид энэ удаагийн сурвалжлагаа сураг төдий гараад өнгөрсөн “цалинтай хог цэвэрлэх” ажлын эргэн тойрноос бэлтгэлээ.

Улмаар Баянзүрх дүүргийн 19-р хорооны оршин суугчдын гудамж талбайгаа цэвэрлэж буй ид ажлын үеэр нь очиж нөхцөл байдлыг дүрсжүүлсэн юм.

Тэд хоёрдахь өдрөө ажилдаа шамдан орсон нь энэ аж. Эхний өдөр өөр нэг гудамжийг хоггүй, цэвэр цэмцгэр болгосон тэд энэ удаад гуу жалга ихтэй хог нилээн хуримтлагдсан талбайд өрнүүлж байна.

Ядарч цуцсан шинжгүй, сэтгэл гарган ажиллаж байгаа тэднийг хараад ойр орчныхоо хогийг цэвэрлээд цалинжуулах ажил нэлээн эерэг үр дүн авчрах нь гэж бодогдож байв.

Учир нь тэдгээр хүмүүс унаа, хоолны мөнгө гаргаж аль нэг дүүрэг, хороонд очихгүй. Зөвхөн оршин суугаа газраа хоггүй болгох үүрэгтэй. Магадгүй өөрсдийнх нь үр хүүхэд, гэр бүл, найз нөхөд амьдардаг орчин болохоор ч тэрүү илүү их сэтгэл гаргаж басхүү сэтгэл хангалуун, чин сэтгэлээсээ цэвэрлэдэг байж болох юм.

Цаашлаад тэд хөдөлмөрөө үнэлүүлж цалинжиж, нийслэлийн өнгө үзэмж, өөрсдийн амьдрах орчин нөхцөлд нь ч эерэг үр дүн үзүүлж  байгаа юм.

Хамгийн гол нь цалинжуулж хог цэвэрлэх хөтөлбөрт ажилгүй гэртээ суудаг эхнэрүүд, нөхрүүд, хөгшид, мөн амралттай байгаа оюутан сурагчид хамрагдаж байгаа юм.

Ингэснээр ажил хийхэд хүндрэлтэй, шалтгаан нөхцөл ихтэй иргэдэд хэрэгцээнийхээ мөнгийг олох боломж, тэтгэврийн хэдэн төгрөгөө хоног тоолон хүлээж суудаг хөгшчүүдэд ч мөн боломж олгож буй давуу талтай байгаа нь ажиглагдаж байлаа.

Цаашлаад цалинтай хог цэвэрлэх хөтөлбөрт бидний хэлж заншсанаар “бөбөөчид”, архи ууж гудамж сүлжихээс хэтэрдэггүй ажилгүй иргэд ихэд дуртайгаар хамрагдаж чадаж байгаа нь сайшаалтай юм.

 Нийслэлд нийт 152 хороонд хог ачих, цэвэрлэх, цуглуулах зэрэг ажлуудад хүн хүчний нөөц бололцоо хангалтгүй байдаг. Тиймээс иргэд өөрсдөө хогоо цэвэрлэж нийслэлээс цалин авах боломжтой болж байгаа нь хэн хэндээ хэрэгтэй, ашигтай зүйл болж чаджээ.

Бид хог цэвэрлэж буй Баянзүрх дүүргийн 19-р хорооны иргэнтэй уулзаж зарим зүйлийг тодруулхад “Хороо тус бүр оршин суугчдаасаа сайн дурынхныг цуглуулж тодорхой төлөвлөгөө, маршрут гаргаж хог цэвэрлэх үүрэг даалгаврыг өгч ажиллуулж байгаа. Манай хорооноос л гэхэд айл бүрээс нэг иргэн хамруулах зорилт дэвшүүлж найм, дөрвөөр нь иргэдээ баг болгож хог цэвэрлэх ажилд “дайчилж” байна.  Бид ойр орчныхоо хогийг цэвэрлээд, бөөгнүүлж, уутанд хийж, нэг газар төвлөрүүлдэг. Харин үүний дараа хогны машин ирж ачиж явдаг. Манай хорооны ажилгүй, гэртээ суудаг хүмүүс маш идэвхтэй оролцож байгаа. Хөгшчүүдэд ч гэсэн нэг талаараа дасал хөдөлгөөн болж эрүүл мэндэд нь тустай, нөгөө талаараа хүнээс гуйхгүй хэдэн төгрөгтэй болох бололцоотой болж байна” гэв.

 Нийслэл хогны асуудал дээр хатуу зохион байгуулалттай ажиллаж, иргэд, төрийн байгууллага хамтран ажилласнаар энэ асуудлаа маш энгийнээр шийдэх боломж бүрдэж байна.

Энэ мэтээрээ төр засаг, иргэдтэйгээ уялдаа холбоотой ажиллаж заншвал удахгүй гэр хорооллын гудамжаар хөглөрөх хог замхран арилж, архичин, ажилгүйгээрээ дуудуулдаг иргэд ч цөөрөх нь ээ.

Д.Ундрах /24tsag.mn/