Энэ жилийн сонгууль дуулиан шуугиантай болох нь тодорхой байна. Учир нь сонгуулийн чимээнээр Н.Энхбаяраас эхлээд олон улс төрчдийн “Ганц худаг” руу цувах зам балрахгүй, үргэлжилсээр байна. Орхон, Говьсүмбэр, Увс аймгийн удирдлагуудыг шүүхээс авлигал хээл хахууль, албан тушаалын хэргээр ялалсан. Одоо ялаа хүлээж байгаа олон аймгийн засаг дарга бий гэсэн яриа тараад удаж байна. Төсвийн эрх мэдлийг орон нутагт шилжүүлснээс хойш иймэрхүү хэрэгүүд их гарах бослон билээ.
  
    Мөн МАН-аас Говьсүмбэр аймагт нэр дэвшсэн Ц.Анандбазарыг өчигдөр АТГ-аас барьж аваад “аавынд” хийчихлээ. Ц.Анандбазарын хойноос явах хүмүүсийн цуваа олон бий гэж яригдаад байна. Тухайлбал МАН-аас Хан-Уул дүүрэгт нэр дэвшсэн Ц.Батбаярыг хотын дарга байхдаа эрх мэдлээ хэтрүүлсэн хэргээр АТГ шалгаж эхэлсэн. Эх сурвалжийн мэдээлэлээр бол түүний бүрэн эрхийг түдгэлзүүлэх бичгийг удахгүй УИХ-д өргөн барих сурагтай. Мөн Н.Энхбаярын Эрдэнэтийн хэрэгтэй холбогдуулан УИХ-ын гишүүн Х.Наранхүүг ч гэсэн шалгаж эхэлсэн.
     Энэ мэтээр МАН-ынхан ээлж дараалан шүүхийн хаалга татаж байна. Үнэхээр тэд хэрэг хийсэн үү, эсвэл сонгуулийн чимээнээр нэр төрийг нь гутаах зорилгоор өрсөлдөгч намын хийж буй ажлууд уу гэдэгт хэн ч хариу өгч чадахгүй байна. АН-ынхан мэдээж МАН-ынханыг авлигал хээл хахууль авсан, эрх мэдлээ ашигласан нь үнэн гэж сонгуулийн үеэр шоу хийх болно. Харин МАН-ынхан улс төрийн хэрэг хэмээн маргаан үүсгэх нь тодорхой. Тиймээс энэ сонгуулийн хамгийн халуун сэдэв, том хөзөр нь улс төрчдийн авлигал, хээл хахуулын асуудал болох нь тодорхой байна.

    Ц.Анандбазарыг найдвартай нэг суудал авчирах байсан гэж МАН-ынхан тооцоолсон. Харин “аавынд” суусан аймгийн дарга нарыг баталгаатай орон нутгийн эрх мэдлээ дахин авах байсан гэсэн мэдээлэл байна. Хэрэв эдгээр нь үнэн бол “аавынх”-ыг зорих улс төрчдийг зориуд яллаж байж мэдэх юм. Ийнхүү шүүх, АТГ-ынхан сонгуулийн өмнө улс төрчдийн зүрхэнд шар ус хуруулж байна.