Ардчилсан намын ёслолын их чуулган намын дарга Н.Алтанхуягийн хэлсэн үгийг хүргэж байна. Сайхан Монгол орны минь саруул ухаант иргэд ээ
Санаа зорилго нэгт эрхэм журмын нөхөд өө
Та бүхэндээ зөөлөн салхи сэвэлзсэн энэ сайхан өдрийн мэндийг хүргэе! Өнөөдөр бид эв эеийн хүчээр их ялалтын буухиаг хурайлан дуудахаар хуран цуглаад байна. Тийм ээ. Энэ цаг мөчөөс эхэлж та бидний зүрх нэг хэмнэлээр цохилж, та бидний тархи нэг зорилгод төвлөрөх болно. Тэр олон зүрх Монгол орныхоо төлөө цохилж, тэр олон тархи Монгол түмнийхээ төлөө чилнэ гэдэгт би эргэлзэхгүй байна.
Айдсын салхийг хулжааж, ардчиллын салхийг хурайлсан Монгол түмэн маань төрийн түшээдээ сонгох хариуцлагатай мөчид тулж ирлээ. Энэ мөчид ардчиллаар овоглосон манай нам ард түмнийхээ итгэлийг дааж, ялалт байгуулахын төлөө сонгуульд орох гэж байна. Ардчилсан нам аливаа өрсөлдөгчөө ялахын төлөөх өчүүхэн зорилгоор энэ сонгуульд ороогүй ээ. Бид сайхан Монгол оронд саад учруулж байгаа бүхнийг ялахын төлөө энэ сонгуульд оролцож байна.
Бид аалзны тор мэт бүрхсэн авилгыг ялахын төлөө,
Ард олныг залхаасан хүнд суртлыг ялахын төлөө,
Амин хувиа хичээсэн бохир бүлэглэлийг ялахын төлөө,
Амьдрал ахуйг туйлдуулсан ядуурлыг ялахын төлөө энэ сонгуульд оролцож байна.
Ахан дүүсээ нөхөд өө
Энэ удаагийн сонгуульд ард түмэн ялах ёстой. Ардчиллын үр шимийг ард түмний нэг хэсэг хүртэж, нөгөө хэсэг нь хоосон хоцрох ёсгүй. Ардчилал бол хүнийг ялгадаггүй нийгмийн тогтолцоо. Тэр тогтолцоог манай оронд жинхэнэ утгаар нь хэрэгжүүлж чадахгүй байгаад л гол учир оршино. Чухамдаа хоосон амлагчид, хор найруулагчид ноёлсоор ирсэн гажиг тогтолцооны уршгаар сонгуулийн үр дүн сонгогч олноос хулжсаар өдийг хүрлээ.
Тэгэхээр ардаа алагчилдаггүй төр, түмнээ туйлдуулдаггүй засгийг бүрдүүлэхийн тулд ард түмэн ялах ёстой, Ардчилсан нам ялах ёстой. Ялахдаа бүрэн дүүрэн ялах ёстой.
Монгол хүн Ардчилсан намаас юу хүсэж байна вэ?
Тэд зөв сэдэл, шударга хөдөлмөрийг дэмжсэн төрийн бодлогыг хүсэж байна. Тэд авилгыг өөгшүүлж, ялзралыг тэлсэн бусармаг түшмэдээс салахыг хүсэж байна. Тэд дэлхийн хэмжээнд өрсөлдөж, олон улсад зөвшөөрөгдөх чанартай боловсрол эзэмшихийг хүсэж байна. Тэд эмнэлэгтээ итгэж, эмчдээ эргэлздэггүй эрүүл мэндийн зөв тогтолцоог хүсэж байна. Тэд бухимдал үүсгэж, дараалалд зогсоодог хүнд суртлаас ангижрахыг хүсэж байна. Тэд ардаа алагчилдаггүй төрийг хүсэж байна.
Монголын Ардчилал өнөөдөр юуг шийдэх хэрэгтэй вэ?
Авилгал
Монгол хүн, Монгол орон, эрх чөлөөний хамгийн гол дайсан бол авилгал юм.
- Авилгал бол улс төрийн ялгаварлан гадуурхалын үндэс,
- Авилгал бол төсөв нэрээр ард түмний хөрөнгийг үргүй зарж, үгүйрүүлэн завшихын эхлэл,
- Авилгал бол хүн хүнийхээ эрх чөлөөнд халдаж, улс орон ялзрахын хамгийн гол шархлаа,
- Авилгал бол Ардчиллын, Ардчилсан намын ирэх дөрвөн жилд үгүй хийх ёстой эрх чөлөөний дайсан юм аа.
Шударга ёс
Авилгалыг арилгах шударга ёсыг тогтоох хоёр нэг тэрэгний хоёр дугуй билээ. Сайхан Монгол орондоо шудрага ёсыг маар биш үйлдлээр тогтоох хамгийн гол үндэс АРДЧИЛСАН ЗАСАГЛАЛ гэж ойлгож байна.
- Шударга ёс тогтооно гэдгээр 47 дугаар өргөрөгөөс өмнө орших хамаг Монголын нутгийг хууль бусаар гишгэх газаргүй болгон уралдан лиценз тараагсадын учрыг олж, хужрыг тунгаан, бузараас үүдээ хааж, буяны үүдийг нээхийг хэлж байна.
- Шудар ёс тогтооно гэдгээр хот суурингийн болоод дархан газрыг хуулиас гадуур олгохыг болиулж, дахин ингэх арван хорын үндэсийг тасалж, хуулийн хүрээнд оруулахыг хэлж байна.
- Шударга ёсыг тогтооно гэдгээр тендерээс төрсөн тэрбумтан, төрөөс төрсөн олигархаас салж, түмний нурууг амрааж, төрийн нурууг түмний үйлчилгээ болгохыг хэлж байна.
- Шударга ёс тогтооно гэдгээр ардын хүү, саятаны хүү, сайдын хүү гурав хуулийн буулганд эн тэнцүү, зэрэгцэн суух тэр цагийг ёс болгохыг хэлж байна.
- Шударга ёс тогтооно гэдгээр Монголын заяагаар бүрэлдсэн газрын доорх эрднэсээ хууль бусаар эзэмшсэн зальтай зайтай, мэдээлэлтэй хүний өөрийн бирдээс салгаж, баялгийн хуваарьлалтыг ил тод болгохыг хэлээд байгаа юм.
Монгол хүний бас нэгэн салшгүй чухал үнэт зүйл бол ажилтай, орлоготой амьдрал. Одоо Монголчууд маань ажиллах, хөдөлмөрлөх цаг ирсэн.
- Монголын төр дахин хөдөлмөрлөх чадвартайгаа халамжилж, хөдөлмөрийн чадваргүйчүүдийн эгнээг зузаалахгүй ээ,
- Монголын төр хөдөлмөрлөх сонирхолтой иргэдээ хөсөр хаяахгүй ээ
- Монгол хүн ажилтай байна гэдэг Монголын дархлаа юм аа,
- Монгол хүн ажилтай байна гэдэг харийн нэгний идэш болохгүйн баталгаа юмаа
Тиймээс Эдийн засгийн хувьсгалаар ажил хөдөлмөрийг бий болгож, авилгалгүй нийгэмд дэхь Эрх чөлөөтэй, Эрдэм боловсролтой, Эрүүл чийрэг, Ажилтай орлоготой, Аюулгүй орчинтой Монгол хүнийг бий болгож Монгол хүн Монголдоо сайхан амьдрана гэдэгт итгэлтэй байна.
Нийслэл
Мөн өнөөдөр дурдахгүй өнгөрч болшгүй сонгуультай холбоотой асуудал бол Нийслэл Улаанбаатар юмаа. Ардын нам ардчиллын 22 жил тасралтгүй нийслэлийг удирдахдаа өнөөдрийн эмх замбараагүй байдал, эх захгүй утаа униарыг бий болгожээ.
Одоо энэ байдлыг итгэлтэй удирдлага, шинэ сэтгэлгээ өөрчилж чадна. Харин тэр итгэл даасан, шинээр сэтгэсэн баг бол Ардчиллын баг юмаа.
Тэгвэл бид Улаанбаатарыг өөрчлөх тэрл баатруудын жагсаалтыг Монгол улсын баатар Эрдэнийн Бат-Үүлээр тэргүүлүүлж байгаа билээ. Утаанд хахаж, түгжрэлд бухимдаж, сургуулийн хүүхдийн биеийн тамирын талбайг дээрэмдэж, ногоон бүсийг нохойн замаар оруулсан энэ хотыг бидэнд нэг удаа өгөөд үз. Бид өөрчилж чадна. Өөрчилж чадах баатраар ахлуулсан ардчиллын баатрууддаа амжилт хүсье.
Эрхэм журмын нөхөд өө
Ардчилагчид юунд зорьж тэмүүлж байгааг, юуг хийж бүтээхийг, улс орноо яаж өөд татахыг харах хүсэл монгол түмэнд байгаа гэдэгт эргэлзэхгүй байна.
Ардчилсан намд ачааны хүндийг үүрүүлж, цөхөрсөн сэтгэлийнхээ цангааг тайлах эрмэлзэл монгол түмэнд байгаа гэдэгт эргэлзэхгүй байна.
Ардчилагчдыг ирийг шалгаж, бярыг таних битүүхэн мөрөөдөл Монгол түмэнд байгаа гэдэгт эргэлзэхгүй байна.
Халуун дулаан итгэл ямагт эрч хүч, зөв тэмүүллийг дагуулдаг. Ард түмнийхээ итгэлийг даасан шиг даах ёс жудаг, итгэл үнэмшил, нөөц боломж манай намд бий гэдгийг Ардчилсан намын даргын хувьд энэ эрхэм индэр дээрээс батлан хэлье.
Ардчиллын үрийг суулгасан атар газрынхаа шимийг ард олондоо хүртээх их аянд бүгдээрээ гар гараасаа барин мордоцгооё. Та биднийг итгэж найдсан, эвсэж дэмжсэн, зэмлэж зөвлөсөн Монгол түмний минь халуун элэг тосно. Тэднийхээ элгийг эмтэлж, сэтгэлийг сэмлэхгүй байх хатуу андгайг өнөөдөр тавьцгаая.
Түмэн олны минь итгэл түшиж, төрийн жолоог атгуулах цаг мөчөөс Ардчилсан Монголд Ардчилсан засаг тогтож, шударга ёс, тэгш амьдралын үүр цайх болно. Тэр үүрийн гэгээг хамтдаа угтацгаая.
Ахан дүүс, журмын нөхдөө
Та бид их хэнгэрэгээ дэлдэн, их бүрээгээ үлээж, их цэргээ жагсаан тулааны талбарт жигдрэн бэлэн боллоо.
Ардчилалын дайчин армийн 76 өрлөг, 76 түмэнтэйгээ ялалт байгуулж, АРДЧИЛСАН ЗАСАГ тогтоох өрсөлдөөнд жигдрэн жагслаа.
Ардчилсан хувьсгалын үргэлжлэл, эдийн засгийн хувьсгалын их салхи хөдөлвөл нижигнэнхэн хөдөлтүгэй.
Хамтдаа ялалтын төлөөх урагшаа. Журмын анд нараа бид ялна. Бид чаднаа.
