МАН-аас Дорноговь, Говьсүмбэр аймгийн тойрогт нэр дэвшихээр зэхэж байсан “Сод Монгол” группын захирал Ц.Анандбазарыг өнгөрсөн сарын 25-нд АТГ-аас баривчлан, ШШГЕГ-ын харьяа цагдан хорих 461 дүгээр ангид саатуулаад 19 хонож байна. Түүнийг “Анод” банкийг дампууруулахад оролцсон хэрэгт сэжигтнээр тооцон, 14 хоног саатуулж, энэ сарын 5-нд суллах байсан ч яллагдагчаар татан үргэлжлүүлэн хоёр сар хорихоор болсон хэмээн эх сурвалж мэдээллээ. Өнгөрсөн сарын 24-нд болсон МАН-ын УИХ-ын сонгуульд нэр дэвшигчдийг тодруулах Бага хурал үүрийн 06.00 цагт дууссан. Энэ хурлаар санал хурааж "Сод Монгол" группын захирал Ц.Анандбазарыг Дорноговь, Говьсүмбэр аймгийн тойргоос сонгуульд өрсөлдүүлэх шийдвэр гарсан юм. Өмнө нь энэ тойргийн намын хороонд дээр ч Ц.Анандбазар 80 гаруй хувийн санал авч, нэр дэвших нь тодорхой болоод байжээ. Харин МАН-ын Бага хурал тарсны дараа Ц.Анандбазарыг найзуудтайгаа нэр дэвших болсон тухайгаа хөөрөлдөж суухад АТГ-ын ажилтнууд ирж, гэнэт баривчилсан билээ.
Дөрөв, таван жилийн турш сунжирч байгаа “Анод”-ын хэрэгт түүнийг холбон удаан хугацаанд шалгаж байсан ч УИХ-д нэр дэвших нь тодорхой болсон өдөр нь гэнэт баривчилсан нь олон хүнд "улс төрийн зорилготой байх магадлалтай" гэсэн сэжиг төрүүлсэн юм.
Гэвч өөр эх сурвалжийн мэдээлснээр "Сод Монгол" ХХК-ны захирал Ч.Чинзориг өөрийн хүчээр байгуулсан энэ компаниа Ц.Анандбазарт алдсан гэж хэвлэлд ярилцлага өгсөн байна. Тэрбээр МАХН-ын дарга Н.Энхбаяр, Ц.Анандбазар нар нийлэн өөрийг нь хохироосон гэж АТГ-т гомдол гаргаад байсан тухай мэдээлсэн юм. Тиймээс түүнийг баривчилсан нь ерөнхийлөгч асан Н.Энхбаяртай холбоотой байх магадлалтай гэж хэлсэн билээ.
Д.Анандбазарыг хээл хахуулийн хэргээр шалгаж, мөрдөн байцаалтын ажиллагаа үргэлжилж байгаа ч яг хэний ямар хэрэгт гэдэг нь одоогоор тодорхойгүй байгаа юм.
Б.Чимэг
