Кино найруулагч, Соёлын тэргүүний ажилтан Г.Бадамрагчааг төрийн эрхийг хууль бусаар авах, хуйвалдаан зохион байгуулсан гэх үндэслэлээр ТЕГ-ын Мөрдөн байцаах хэлтсээс Эрүүгийн хуулийн тусгай ангийн 82 дугаар зүйлд заасны дагуу эрүүгийн хэрэг үүсгэн шалгаж байгаа.
    Кино найруулагч, Соёлын тэргүүний ажилтан Г.Бадамрагчааг төрийн эрхийг хууль бусаар авах, хуйвалдаан зохион байгуулсан гэх үндэслэлээр ТЕГ-ын Мөрдөн байцаах хэлтсээс Эрүүгийн хуулийн тусгай ангийн 82 дугаар зүйлд заасны дагуу эрүүгийн хэрэг үүсгэн шалгаж байгаа. Түүнийг ШШГЕГ-ын харьяа цагдан хорих 461 дүгээр ангид саатуулаад сар гаруй хугацаа өнгөрч байгаа юм. Мөн уг хэрэгт түүнтэй хамтран ажилладаг арав гаруй хүнийг сэжигтнээр шалгаж байгаа аж.
    Түүнийг саатуулан шалгасныг иргэд уран бүтээлтэй нь холбогдуулан шалгалаа хэмээн үзэж байгаа юм. Учир нь тэрээр бие хамгаалах урлагаар хичээллэдэг бөгөөд Монголд орлон тоглогчдыг бэлтгэх холбоо байгуулж байжээ. Мөн бие хамгаалах урлагаар хичээллэдэг 30 гаруй залуустай хамтран ажиллаж, зодоонтой кинон дээрээ тэднээс тусламж авдаг байсан аж. Хамгийн сүүлд энхийг сахиулах ажиллагаанд монгол цэрэг оролцож эхэлсний арван жилийн ойн баримтат киног хийхээр судалгаа хийж байжээ. Гэвч захиалагч талтайгаа тохиролцож чадалгүй ажлаа зогсоосон байна. Мөн түүний найруулсан "Цагдаагийн тангараг-2" уран сайхны кино нээлтээ хийхээр бэлтгэж байсан аж.
    Гэвч ТЕГ-аас “Тэднийг уран бүтээлтэй нь холбогдуулан эсвэл улс төрийн зорилгоор шалгаагүй. Эрүүгийн хэрэг үүсгэн шалгах хангалттай баримт байсан учраас шалгаж байна. Эдгээр иргэний далдуур төлөвлөж, бэлтгэж байсан үйл ажиллагааны талаарх мэдээлэл манай байгууллагад ирсэн. Түүнээс хойш хуульд заасан үндэслэл журам, арга хэлбэрээр шалгаж эхэлсэн. Тэгээд болзошгүй хор хохирлоос сэргийлэх зайлшгүй шаардлагын дагуу таслан зогсоож, эрүүгийн хэрэг үүсгэсэн” хэмээн тайлбарлав.
    Мөн уг хэрэгт БНХАУ-ын иргэн байж байгаад харьяаллаасаа гарч, Монгол Улсад олон жил амьдарч байгаа харьяалалгүй этгээдийг шалгаж байгаа аж.