МАХН-ын дарга Н.Энхбаярт холбогдох шүүх хурал өнөөдөр Сүхбаатар дүүргийн шүүхийн Эрүүгийн танхимд 10.00 цагаас болно. Хуралд даргалагч шүүгчээр С.Соёмбо-Эрдэнэ, шүүгчээр М.Алдар, С.Оюунчимэг, улсын яллагчаар Е.Сагсай, О.Мөнхбаатар, өмгөөлөгчөөр Б.Оюунбилэг нар оролцохоор болжээ. Түүнийг Эрүүгийн хуулийн 150.3, 263.2-т зааснаар буруутган яллах дүгнэлт үйлдэж, шүүхээр болоод байгаа билээ. Мөн түүнтэй хамт До.Чулуунбаатар Д.Дуламсүрэн, Ж.Мягмаржаргал нарыг шүүх юм. Уг шүүх хурал өмнө нь хоёр удаа товлогдсон ч Н.Энхбаярын биеийн байдал муу, өмгөөлөгчдөөсөө татгалзаж байна гэх шалтгаанаар хоёр удаа хойшилсон.
Харин энэ удаагийн шүүх хурлыг хойшлуулахгүй хийнэ гэдгээ хурлыг даргалагч шүүгч С.Соёмбо-Эрдэнэ мэдэгдээд буй. Гэвч шүүгдэгч Н.Энхбаяр 49 хавтаст хэргийн гуравтай нь танилцаад байгаагаа мэдэгдсэн юм. Өнгөрсөн сарын 24-нд товлогдсон шүүх хурал хойшлоход хэрэгт УИХ-ын гишүүн Х.Наранхүүг гэрчээр оролцуулах санал гарсан. Уг хүсэлтийг шүүх бүрэлдэхүүн хүлээж авсан учраас өнөөдрийн шүүх хуралд Х.Наранхүү гишүүн оролцож магадгүй хэмээн эх сурвалж мэдээллээ.
Хэрвээ өнөөдрийн шүүх хурлаар Н.Энхбаяр нарын гэм буруутай нь тогтоогдвол 150.3-т эд хөрөнгийг хурааж, таваас дээш арван жил хүртэл хугацаагаар хорих ялаар, 263.2-д тодорхой албан тушаал эрхлэх, үйл ажиллагаа явуулах эрхийг таван жил хүртэл хугацаагаар хасч хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жил хүртэл хугацаагаар хорих ял шийтгэнэ хэмээн заажээ.
Б.Чимэг
