Өнгөрсөн бямба гарагт буюу зургаадугаар сарын есний өдөр Монгол улсын иргэн Б.Пүрэвдорж болон Узбекстаны харьяат М.Авезов нарыг хутгалсан хэргээр Оросын неонацист бүлэглэлийнхнийг шүүх хурал болсон тухай 24tsag.mn мэдээлж байсан билээ. Тэгвэл оросын сайтуудад бичсэнээр тэдгээр танхайн хэрэгтэй этгээдүүдэд ОХУ-ын Тангарагтны шүүх 6-8 жилийн ял оноосон байна.
  Оросын “Норд ийст 88” хэмээх неонацист бүлэглэлийн гишүүн болох 19 настай Г.Головановт онцгой дэглэмтэй хорих ангид зургаан жил, 21 настай Е.Маренчукт найман жил хорих ял өгчээ.

   2010 оны тавдугаар сард Монгол улсын иргэн Б.Пүрэвдоржийг болон Узбекстаны харьяат М.Авезов нарыг хутгалж, биед нь хүнд гэмтэл учруулсан юм.  Тус неонацист бүлэглэлийн гишүүн Г.Голованов, Е.Маренчук нар Б.Пүрэвдоржийг цахилгаан тэрэгний буудлын орчим явж байхад нь цээжин тус газар нь хутгалаад, зугатжээ. Тэд мөн Узбекстаны иргэн М.Авезовыг хутгалсан бөгөөд тэрбээр шархаа дээлгүй эмнэлэгт нас барсан юм.  Өмнө нь болсон шүүх хурлаар тэднийг Узбекстаны иргэн М.Авезовын нас барсанд буруугүй гэж цагаатгасан бөгөөд харин танхайран, бие махбодод нь хүнд гэмтэл учруулсан хэрэгт буруутай гэж ийм хэмжээний ял өгсөн аж. Өөрөөр хэлбэл Узбекстаны иргэний шархаа даалгүй нас барсныг Москва хотын шүүх аллага гэж үзээгүй.

  Орос бус төрхтэй Москвагийн зочдыг “ангуучилдаг” энэ фашист бүлгэмд 16-27 насны үндсэрхэг үзэлтэй залуус нэгдээд байсан юм. Монголын иргэн Б.Пүрэвдорж ч мөн ийм үндсэрхэг үзлийнх нь золиос болон, хүнд гэмтэл авсан аж. Шүүгдэж байгаа Г.Голованов, Е.Маренчук нарын нэг нь 18, нөгөө нь 21 настай. Харин “Норд ийст 88”-ийн удирдагч 20 настай Деннис Кузницов нь үндэстэн хоорондын мөргөлдөөнд турхисарсан, үндсэрхэг үзлийг сурталчилсан гэж 2011 оны намар ял авч байжээ. Тэрбээр орос биш царайтай хүмүүсийг дээрэмдэн зодож, танхайрахыг бусад гишүүддээ уриалдаг ч өөрөө үүнд гар бие оролцдоггүй аж.