Монголын гурилын зах зээлийг хангадаг томоохон үйлдвэрүүдийн нэг "Алтант тариа" ХХК-ий буудайн нөөц шавхагдсны улмаас долоо хоног гурилын үйлдвэрлэлээ зогсоогоод байгаа. Тиймээс зах зээл дээр бага савалгаатай гурил хомсдоод байгаа юм. Бөөний худалдааны төвүүд дээр ч гурилын үнэ нэмэгдэж эхэлжээ.
   Нарантуул зах дээр дээдийн дээд гурил- 1 кг 1100 төгрөг, 10 кг- 10800 төгрөг, 25 кг- 24500 төгрөгөөр, дээд гурил 1 кг- 850 төгрөг, 10 кг- 8000 төгрөг, 25 кг- 18000 төгрөгөөр зарж байна. Мөн "Бөмбөгөр" худалдааны төвд "Алтайн тариа"-н дээд 1 кг нь 800 төгрөг, 1-р гурил 750, 2-р гурил 1 кг- 500 төгрөг, Улаанбаатар 1-р гурил 10 кг нь 6500 төгрөгөөр худалдаалагдаж байна. 
   "Алтай тариа" ХХК одоогоор ХХААХҮЯ-ны Тариалан эрхлэлтийг дэмжих сангаас буудайг бага багаар авч, нөөцөө бүрдүүлэхээр ажиллаж байгаа аж. Хэрэв үйлдвэрийн үйл ажиллагаа жигдэрвэл хуучин үнээрээ зарах юм байна. Одоогоор зах зээл дээр 20-30 төгрөгөөр нэмэгдээд байгаа нь гурил хомсдож байгаа сургаар наймаачдын нэмсэн үнэ гэж тус компанийхан тайлбарлаж байгаа юм.