УИХ-ын 2012 оны сонгуульд бөхчүүд, дуучид гээд содон нэр дэвшигчид олон байна. Тухайлбал хошин урлагийн жүжигчин Батзанын Батзаяа МУНН-аас УИХ-ын 22-р тойрогт нэр дэвшиж байгаа юм. Тэрбээр сонгуулийн сурталчилгааны ажлаа урлагийн хүн гэдэг утгаараа тун өвөрмөц явуулахаар төлөвлөж байгаа аж. Гэхдээ ихэнхи нэр дэвшигчид шиг сонгуульд мөнгө цацах боломжгүй тул ойр дотны хүмүүсээсээ мөнгө цуглуулж байгаа гэв. Жүжигчин Б.Батзаяа “Миний уран бүтээл намайг Монголын үзэгчдэд танил болгосон. Тэгэхээр би өөрийгөө танилцуулах шаардлаггүй. Энэ миний давуу тал” гэжээ. Үнэхээр ч Б.Батзаяаг найман настай балчраас наян настай хөгшид хүртэл сайн мэддэг билээ. Харин УИХ-д гэнэт нэр дэвших болсонд хавь ойрын хүмүүс нь баахан гайхаж байгаа аж. Тэрбээр үүний хариуд “Би 1990 оны ардчилсан хувьсгалаас эхлээд ардчиллын төлөөх үйл хэрэгт идэвхитэй оролцож ирсэн. МоАХ-ны хуралд ч үг хэлж явлаа” гэжээ.
   Бизнес эрхэлдэггүй, өөрийнх нь тодорхойлсноор “ард түмэнтэйгээ, хашаа байшинд амьдарч яваа хүн” тул Б.Батзаяад сонгуулийн сурталчилгааны зардлаа хаанаас гаргах вэ гэсэн асуудал тулгараад байгаа аж. Гэлээ ч ах дүү, найз нөхдөөсөө хандиваар цуглуулсан мөнгөөрөө тойргийн иргэдтэйгээ уулзалт хийгээд эхэлжээ.

   Жүжигчин Б.Батзаяа яагаад заавал МУНН-аас нэр дэвшихээр сонгосон бэ гэдэг нь сонин. Тэрбээр МУНН-ыг “ганц цэвэр цустай нам” гэж тодорхойлсон бөгөөд О.Дашбалбар агсны байгуулсан нам тул үзэл бодол нь таалагдсан хэмээсэн байна. Монгол уламжлалт ёсыг хайрлан хадгалах, хойч үедээ өвлүүлэхээс гадна Монголд шударга ёсыг тогтоохоор мөрийн хөтөлбөртөө оруулжээ. Мөн тэрбээр УИХ-ын гишүүн болж чадвал иргэддээ улирал бүр, сар бүр хийсэн ажлынхаа тайланг тавина гэсэн амлалт өгч  байгаа юм.
   Сонирхуулж хэлэхэд, Б.Батзаяагийн үеэл ах нийтлэлч Б.Баабар түүнийг УИХ-д нэр дэвшихэд тийм ч таатай хандахгүй байгаа бөгөөд “Батзаяа яахнав дээ” гэж дурамжхан байгаа аж.