МАХН-МҮАН-ын Шударга ёс бүлгэмээс нэр дэвшиж байсан доктор С.Авирмэд хүн гүтгэсэн хэргээр Сүхбаатар дүүргийн прокурор, мөрдөн байцаах тасгаас хэрэгт татагдан шалгагдаж байгаа талаараа сэтгүүлчдэд хандлаа.С.Авирмэд Оюутогойн гэрээг зассан нэр бүхий УИХ-ын гишүүдийг “Ашигт малтмалын тухай хуулийн 5, 5 гэсэн заалтыг эх орныхоо эрх ашигт үл нийцсэн байдлаар засварласан нэр бүхий гишүүд эх орноосоо урваж байгаа хэрэг” хэмээн хэлснийхээ төлөө ийнхүү хэрэгт татагдаж сэжигтэн болжээ. Түүнийг хэвлэл мэдээллийн хэрэгсэлд ийнхүү ярилцлага өгсөнд нэр бүхий гишүүд ихэд бухимдаж нэр төрөө сэргээлгэнэ хэмээн дөрөвдүгээр сарын 27-нд өмгөөлөгчдийнхөө хамт ирж С.Авирмэдэд шаардах хуудас өгсөн байна.
Уг шаардах хуудсанд “Бидний нэр төрийг хэвлэл мэдээллийн хэрэгслээр доромжилсон тул уучлал гуй. Хэрэв хэвлэл мэдээллийн хэрэгслээр уучлал гуйж гүтгэн доромжилсон гэдгээ хүлээхгүй бол Эрүүгийн хуулийн дагуу хэрэгт татна” гэсэн байжээ. Харин С.Авирмэд уучлал гуйхгүй гэсэн байр суурьтай байгаа юм байна. Энэ талаараа тэрбээр “Надад хүн гүтгэсэн зүйл байхгүй. Нэр бүхий гишүүд болон бусад холбогдох хүмүүс Ашигт малтмалын тухай хуулийн 5, 5 гэсэн заалтыг эх орны эрх ашигт ноцтой нөлөөлөх байдлаар зассан нь үнэн. Энэ нь тухайн үеийн ээлжит бус хуралдааны протокол болон бусад баримт бичиг дээр байгаа. Хүнийг гүтгэнэ гэдэг нь ор үндэсгүй зүйл ярьж нэр төрийг нь гутаана гэсэн үг гэж би ойлгож байна. Гэтэл тэдний хийсэн хэрэг баримт бичиг дээр байгаад зогсохгүй ард түмэн мэдэж байгаа” гэлээ.
С.Авирмэдийн өмгөөлөгчөөр С.Нарангэрэл ажиллаж эхэлсэн байна. Тэрбээр өмгөөлөгчийн хувьд “Ашигт малтмалын хуулийг өөрсөддөө болон гадаадын улс орнуудад ашигтай, монголын ард түмэн, эх орны эрх ашгийг ноцтой зөрчсөн байдлаар засварласан нь үнэн. Тиймээс С.Авирмэдийг хүн гүтгэсэн гэж үзэх үндэслэл байхгүй. Хэрэв С.Авирмэдийг буруутгаж хэрэгт татаж байгаа бол энэ хуулийг эсэргүүцэж байсан иргэд, төрийн бус байгууллага зэргийн бүх хүмүүсийг мөн хэрэгт татах шаардлага гарна. Тиймээс энэ бол С.Авирмэдийг улс төрд гаргахгүй, өөрсдийнх нь хийсэн бузар хэргийн талаар чимээгүй байлгах гэсэн улс төрийн зорилготой хэрэг юм” гэсэн юм.
Ашигт малтмалын хуулийн 5, 5-д зааснаар манай орны хөгжлийн гол тулгуур болсон томоохон ордны 34 хувийг монголчууд, үлдсэн хувийг гадаадынхан эзэмших талаар заасан байдаг. Энэ талаар С.Авирмэд доктор зургаан жилийн турш ярьж, эсэргүүцэж байгаа бөгөөд сонгуульд нэр дэвших эрхийг нь хассан талаар Үндсэн хуулийн цэцэд хандсан байх үед нь ийнхүү хэрэгт татаж шалгаж байгаа нь цэвэр улс төрийн зорилготой хэрэг хэмээн ихэнх хүмүүс үзэж байна.
Б.Чимэг
