УИХ дахь АН-ын бүлэг өнөөдрийн хуралдаанаараа энэ долоо хоногт байнгын хороо, чуулганы нэгдсэн хуралдаанаар хэлэлцэх хэд, хэдэн хуулийг төслийг хэлэлцсэнээс гадна УИХ-ын дарга болон Ерөнхий сайдын мэдээлэлийг сонссон байна. Мөн Улс төрийн намын тухай хуулийн төслийг хэлэлцээд УИХ-аар хэлэлцүүлэх нь зүйтэй гэдэгт санал нэгджээ. Ерөнхийлөгчийн санаачилсан Сонгогдсон болон томилогдсон төрийн өндөр албан тушаалтанд хариуцлага тооцох тухай хуулийн төслийг энэ удаагийн чуулганаар хэлэлцүүлэх шаардлагагүй гэж үзжээ. Мөн энэ онд зохион байгуулагдах Монгол Улсын эдийн засгийн форумыг хэрхэн зохион байгуулах талаар ЗГХЭГ-ын дарга С.Баярцогтын танилцуулгыг сонссон байна. УИХ-ын гишүүн Д.Ганбат нарын өргөн барьсан Иргэний хуульд нэмэлт оруулах тухай хууль болон Үл хөдлөх эд хөрөнгийн барьцааны тухай хуульд өөрчлөлт оруулах тухай хуулийн төслийг бүлгийн хуралдаанаар 100 хувь дэмжиж, УИХ-ын чуулганаар яаралтай хэлэлцүүлэх ёстой гэсэн байр суурьт нэгджээ. Мөн Өргөдлийн байнгын хорооны даргад УИХ-ын гишүүн Ж.Батзандангийн нэрийг дэвшүүлжээ.

Дараа нь сэтгүүлчдийн сонирхсон асуултад хариулт өглөө.

-Монгол Улсын Ерөнхийлөгчөөс өргөн барьсан Хариуцлагын тухай хуулийг Ардчилсан намын бүлэг яагаад дэмжсэнгүй вэ. Хойшлуулсан шалтгаан юу вэ. Бүрэн эрх нь дуусч байгаа парламент энэ хуулийг батлаад явчих юм бол дараа, дараагийн УИХ-д хрэгтэй хууль байсан юм биш үү?

-Б.Гарамгайбаатар: Энэ хуулийн төсөл Төрийн байгуулалтын байнгын хороон дээр хэлэлцэгдээд олонхийн дэмжлэг авч чадаагүй. Үүнийг УИХ-аар дахин хэлэлцүүлэх талаар Ерөнхийлөгч санал, санаачлага гаргасан. Ардчилсан намын бүлгийн гишүүд ярилцаад нэгэнт байнгын хороогоор дэмжлэг авч чадаагүй хуулийн төслийг хэлэлцэх шаардлагагүй. Зарим нэг зүйл, заалтыг хүлээж авахад төвөгтэй байдалтай байна. Тиймээс энэ асуудлыг цэгцэлчих юм бол хүлээж авах боломж бий. Тэгэхгүй бол улс төрийн хэрүүлийн алим үүсэх нөхцөл байдалд орно.

-Ш.Түвдэндорж: Үндсэн хууль болон бусад хуультай зөрчилдсөн зүйлүүд байгаа учраас байнгын хорооны хуралдаан дээр дэмжигдээгүй. Тиймээс бүлэг ийм байр суурь барьж байна. Хаврын чуулганаар энэ асуудлыг магадгүй хэлэлцээд дараагийн парламентын бүрэн эрхийн хугацаанд хэрэгжүүлбэл зүгээр байх гэсэн байр суурьтай байна.

-С.Одонтуяа:- “Бүлгийн хуралдаан дээр хүүхдийн мөнгөний талаар ярилцлаа. Тодотгол хийгээд 40 орчим тэрбум төгрөгийн нэмэлт зардал гарах байх. НӨАТ-ын албан татварын тухай хууль хэрэгжиж байгаа. Иргэдээс байгууллагууд бэлтгэлгүй байна гэсэн тодорхой шүүмжлэлүүд ирж байгаа. Энэ талаар Засгийн газарт үүрэг өгсөн. Энэ хуулийг иргэд дэмжиж байна. Ипотекийн зээлийн хувьд УИХ-ын дарга, бүлгийн дарга нар тодорхой мэдээлэлүүд хийсэн. Өнгөрсөн хугацаанд 75 мянган өрх хамрагдсанаас ердөө 40 хүн буюу 0,05 хувь нь энэ зээлээ төлөхөд бэрхшээлтэй учирч байгаа. Тийм учраас энэ урьд өмнөх зээлүүдийг бодвол хамгийн бага эрсдэлтэй, хамгийн боломжтой зээл гэж үзээд цаашид хүүг нь бууруулах, ард иргэдийг дэмжих, дунд давхаргынханыг хамруулах тал дээр нэлээд зүйл санаачилж хийнэ. Иргэдийн худалдаж авах биш түрээсийн орон сууцны асуудлаар УИХ-ын гишүүдэд маш их өргөдөл ирж байгаа учраас үүнийг Засгийн газарт онцгой анхаарч ажиллах үүрэг өгсөн. Мөн Хөдөлмөрийн сайдад бүтээн байгуулалтын явцад ажилгүй байгаа залуучуудыг МСҮТ-д олноор нь хамруулах, төсөв санхүүжилтыг шийдэх, мэргэжилтэй, боловсролтой болгох асуудал анхаарах үүрэг өгсөн”

- Үл хөдлөх хөрөнгийн барьцааны тухай хуулийг өөрчилнө гэж байна. Яг ямар өөрчлөлт орох юм бол? Уг асуудал Үндсэн хуулийн цэц дээр маргаантай байгаа шүү дээ?

Б.Гарамгайбаатар:- Иргэний хуульд нэмэлт, өөрчлөлт оруулах тухай, Үл хөдлөх эд хөрөнгийн барьцаалан зээлдүүлэх хуулийн төсөлд өөрчлөлт оруулах тухай хуулийн төслүүдийг өнгөрсөн баасан гаригт өргөн барьсан. Цэцийн гаргасан дүгнэлтээр өмнөх хууль хүчингүй болж байна гэсэн үг. Тиймээс Монголын банкуудын холбоо болон Монгол банкнаас орон сууцны 8 хувийн зээлийг зогсоосон. Ганц моргейжийн зээл ч биш бусад зээлүүдийг ч мөн зогсоосон. Тийм учраас АН, “Шударга ёс” эвсэл, ИЗНН-ын гишүүд хамтарч шинэ хуулийн төсөл өргөн барьсан. Одоо байнгын хороо, чуулганы нэгдсэн хуралдаанаар батлагдаж гарах юм бол орон сууцны зээлийн үйл ажиллагаа сэргэх юм. Уг хуулинд тодорхой зарчмын өөрчлөлтүүдийг оруулсан. Нэг үгээр хэлбэл, Монголын ипотекийн корпораци, Банкуудын холбоо, Монгол банкнаас моргейжийн зээлийн хүүг бууруулах боломж бүрдсэн байна гэж хэлж болно. 14 хувийн инфляцитай байхад 8 хувиар зээл олгож байсан. Одоо 2.9 хувьтай инфляци дээр ирсэн учир зээлийн хүү 5 хүртэл хувиар буурах боломжтой гэж үзэж байгаа. Одоо өргөн баригдах гэж буй асуудлууд дээр яг энэ асуудлуудыг цэгцлэхээр тусгасан. Байрны хэмжээг 81мкв гэсэн хязгаар тогтоож зээл олгодог байсныг болиулж байгаа. 8 хувийн моргейжийн зээлтэй болбол нэг өрхийн сарын орлого 1.3 сая төгрөг байх ёстой байсан. Одоо 5 хувь болж байгаа учир 530 мянган төгрөгийн орлоготой иргэн моргейжийн зээлд хамрагдах боломж нээгдэж байгаа. Ингэхдээ 43 мкв байрнаас сонгоно. Хуулинд оруулж буй өөрчлөлтөөр иргэн банкнаас зөвшөөрөл авахгүйгээр байраа түрээслэх буюу бизнесийн орлого олох үйл ажиллагаанд ашиглах боломжтой болж байгаа. Түүнээс зарж, борлуулах асуудалд банкнаас зөвшөөрөл авна гэж тусгасан. 

С.Одонтуяа:- Бид аль болох орон сууцны хүүг бууруулах асуудал дээр анхаарч байгаа. Мөн байртай болох боломжгүй иргэдэд төрөөс дэмжлэг үзүүлэх боломжийг хайж байна.

- Эрүүл мэнд, спортын сайдын асуудлыг хэзээ шийдвэрлэх юм бол?

- Энэ бол Ерөнхий сайдын мэдлийн хүрээний асуудал. АН-ын бүлгээс уг асуудлыг яаралтай шийдвэрлэх чиглэлийг өгсөн. 

Т.Хулан