Хошууч генерал Ч.Амарболд нарт шүүхээс ял ногдуулснаас хойш зургаа хонож байна. Энэ хугацаанд тэдний ар гэрийнхэн “Шүүгч нар гэмгүй хүмүүст хилсээр ял ногдууллаа” гэж ярьж хэлэхээс бус албан ёсоор байр сууриа илэрхийлээгүй юм. Харин өнөөдөр “Үндэсний мэдээллийн төв”-д хошууч генерал Ч.Амарболд, хурандаа Ш.Батсүх, О.Зоригт нарын ар гэрийнхэн сэтгүүлчидтэй уулзаж, шүүхийн шийдвэрийн талаар байр сууриа илэрхийллээ. Тэдний байр суурийг багцлан хүргэе. Ж.Алтангэрэл: “Гурван албан хаагч маань амиа алдсан гэдгийг мэдэх үү”
Цагдаагийн ар гэрийн холбооны тэргүүн Ж.Алтангэрэл “Шүүхийг бид үнэн зөвөөр нь ялгана гэж хүлээж байсан. Харамсалтай нь, Сүхбаатар дүүргийн шүүгч нар улс төрийн захиалгаа маш амжилттай биелүүлж манай албан хаагчдад ял ногдууллаа. Шүүх бүрэлдэхүүн хууль зөрчиж хэргийг шүүснийг Хүний эрхийн комиссынхон хүртэл баталж байна. Хурандаа О.Зоригтыг өмгөөлөгчгүйгээр шүүлээ. Нөгөө хэд нь өмгөөлөгчтэй гэдэг ч хавтаст хэрэгтэй нь бүрэн гүйцэт танилцуулахгүйгээр шүүх хуралд оруулах жишээтэй. Энэ мэтчилэн Монголын төр цагдаад харгис хандаж байгааг ойлгохгүй байна. Хэрэв Монголын төр үймээнийг таслан сэргийлсэн цагдаа нарыг буруутан болгоод дуусах гэж байгаа бол бид хохирлоо нэхэмжлэх болно. Тухайлбал, үймээнээр албан үүргээ гүйцэтгэж байгаад бэртэл авч улмаар амиа алдсан гурван албан хаагчийн амь насны хохирол болох 50 сая төгрөг, ямар нэгэн аргаар бэртгэж гэмтсэн 300 гаруй албан хаагчдын эрүүл мэндийн нөхөн төлбөр гээд бүгдийг нь төрөөс нэхэмжлэхээр боллоо. Монголын төр цагдаадаа дэндүү харгис хандаж байна” гэв.
“С.Баяр нарыг яагаад гэрчээр оруулсангүй вэ”
Ш.Батсүхийн дүү Ш.Баттулга “Таван хүн амь үрэгдэж, олон хүн гэмтэж бэртсэн хэрэгт үймээнийг дэгдээсэн хүмүүс буруутай гэдгийг монголчууд бүгд мэднэ. Гэтэл бүх хүний мэдэж байгаа энэ хэргийн шүүх хурлыг яагаад хаалттай явуулсан бэ. Мөн тухайн үеийн Үндэсний аюулгүй байдлын зөвлөлийн гишүүд болох С.Баяр, Ц.Мөнх-Оргил, Н.Энхбаяр нарыг гэрчээр оруулна гэсэн яасан бэ. Гэмтэж, бэртсэн цагдаа нарыг яагаад хохирогчоор татаагүй юм бэ. Шүүгдэгч өөрийгөө өмгөөлье гэсэн хүсэлтийг бичгээр гаргасан тохиолдолд хүлээж авах ёстой гээд хуульд заачихсан байдаг. Гэтэл яагаад О.Зоригтыг өмгөөлөгчгүйгээр хуралд оролцуулав гээд асуух зүйл их байна. Үндсэндээ шүүх хурал хууль бус болсон” гэв.
“Жинхэнэ буруутныг олоогүй цагт ард түмний гомдол тайлагдахгүй”
Ч.Амарболдын ах Ч.Энхболд “Шүүх хурлыг ард түмэнд нээлттэй байлгахыг бид анхнаасаа хүсч байсан. Яагаад гэхээр цагдаа нар сонгууль будлиантуулаагүй, жагсаагүй, эмх замбараагүй байдал бий болгоогүй. Ийм байхад яллаж байгаа нь хуульд нийцээгүй, хүний эрхийг зөрчсөн асуудал боллоо. Хамгийн гол нь цэргийн гэмт хэргийн тохирохгүй зүйл ангиар зүйлчилсэн гэдгийг олон хуульч хэлдэг. Тэгээд ч шүүхийн болон мөрдөн байцаалтын шатанд цагдаа хүн буудсаныг тогтоогоогүй. Тухайн үед дотоодын нэг ч цэргийг оруулаагүй гэдгийг Ч.Амарболд хариуцлагатайгаар олон удаа хэлж, баталсан. Шүүх хурал дээр ч хэлсэн. Гэтэл тэдэнд Эрүүгийн хуулийн 294.2-т зааснаар ”Захирагч эрх мэдэл албан тушаалынхаа байдлыг урвуулан, албаны бүрэн эрхээ хэрэгжүүлээгүйгээс төрд онц их хэмжээний хохирол учруулсан” хэмээн үзэж анхан шатны шүүхээс ял ногдуулсан нь хууль зөрчсөн үйлдэл. Хэдийгээр тэд өнөөдөр ял сонсоод өнгөрч байгаа ч энэ хэргийн жинхэнэ буруутныг олоогүй цагт ард түмний гомдол тайлагдахгүй” гэв.
“Миний дүүгийн өвчнийг үл тоож, өмгөөлөгчгүйгээр шүүсэн нь шударга ёс уу”
О.Зоригтын ах О.Оюунцэрэн “Шүүх хурал олон хуулийн заалтыг уландаа гишгэлээ. Үүнийг мэргэжлийн хуульчид, бүр хохирогч талын өмгөөлөгч ч хэлсэн. Үнэндээ жагсаал цуглаан зохион байгуулсан хүмүүс гол буруутан шүү дээ. Сонгуулийг будлиантуулсан тэр хүмүүс өнөөдөр хаана байна. О.Зоригтын хувьд арай дэндүү хатуу хурал боллоо. Хоёр өдөр хагас хэвтээ байдалд байлгаж байгаад л ял өгчихлөө. Мэдүүлэг ч өгөөгүй. Сүүлд нь л тайлбар өгсөн байх. Уг нь шүүх хурал мэтгэлцээний журмаар явагдах ёстой байсан. Ерөөсөө сонгуулийн өмнө ял өгөх зорилготой байгаа юм шиг харагдсан. Бид Сүхбаатар дүүргийн шүүхийг гайхаж байна. Ч.Амарболд генералыг тухайн үед Баянзүрх дүүргийн шүүхээс ЦЕГ-ын дарга байгаагүй гэж тогтоосоор байтал түүнийг үл ойшоосон нь энэ хүмүүсийг цаанаас удирдаад, зохион байгуулаад байна гэдгийг баталсан. Гэхдээ энэ хүмүүст буруу өгөх юу байх вэ. Дарамтад орсон гэж бодож байна. Ингэснээрээ хэзээ нэгэн цагт шүүгдэх л байх. Харин өнөөдөр үү, маргааш уу гэдэг нь өөр. Юм яаж ч өөрчлөгдөж болно. Буруу зүйл хийсэн хүн заавал шийтгүүлдэг шүү дээ” гэв.
Б.Чимэг
