Кино найруулагч, Соёлын тэргүүний ажилтан Г.Бадамрагчааг төрийн эрхийг хууль бусаар авах, хуйвалдаан зохион байгуулсан гэх үндэслэлээр ТЕГ-ын Мөрдөн байцаах хэлтсээс Эрүүгийн хуулийн тусгай ангийн 82 дугаар зүйлд заасны дагуу эрүүгийн хэрэг үүсгэн шалгаж байгаа талаар өнөөдөр жүжигчин Дорждагва, Р.Анхням нар өөрсдийн байр сууриа илэрхийллээ. Жүжигчин Дорждагва: “Найруулагч Г.Бадамрагчааг би сайн мэднэ. Тэрээр ийм хэрэг хийх хүн биш. Энэ хүнийг хилс хэрэгт унагах ямар хэрэг байгаа юм болоо. Энэ хэний захиалгаар хийгдэж байгаа ажил вэ? Өнөөдөр монголын төр үнэхээр арчаагүй болжээ. Хэн нэгэн эрх мэдэлтэнд үйлчилдэг болж. ТЕГ-ын Энхтөр гэж байцаагч Ш.Бадамрагчаад “Чамайг Төв аймгийн мөрдөн рүү явуулна, цаазаар авна” гэсэн байгаа юм. Өнөөдөр энэ хүн цаазаар авахыг мэддэг болоо юу? Энэ хүн хэний захиалгаар үйлчлээд байна вэ? Уран бүтээл хийгээд явж байсан хэдэн хүүхдүүдийг төр эргүүлчихнэ гэж айдаг ямар арчаагүй төр вэ. Хийгээгүй хэргийг нь тохож амь насанд заналхийлээд байгаа ямар хөгийн төр вэ. Энэ юу болоод байна. Төр ард түмнээ хамгаалахын тулд байдаг гэж би ойлгодог. Төр эргүүлэх байтугай улс төрийн төсөөлөл ч үгүй хүнийг буу тулгаад аваад явж байгааг юу гэж ойлгох вэ. Харин үүнийхээ оронд улс орныг зараад ураад хэдэн хэсэг болгочихсон тэр хэдэн нөхдүүдээ тэгдэг болоосой. Эрүүл ухаанаар бодоод үзэхэд Н.Энхбаяр, Ц.Нямдорж нарын эрүүлэх гээд чадахгүй байгаа төрийг Г.Бадамрагчаа яаж эргүүлэх юм бэ” гэв.
Харин жүжигчин Р.Анхням “Би найруулагч Г.Бадамрагчаатай 2007 онд анх “Үнсэлт” кинонд хамтран ажиллсанаас хойш уран бүтээлийн төдийгүй гэр бүлийн анд найзууд болсон. Бид байнга холбоотой байж хийхээр төлөвлөсөн, хийж бүтээсэн уран бүтээлээ байнга ярилцдаг байсан. Г.Бадамрагчааг баривчлагдсаныг эхнэртэй нь утсаар ярьж анх мэдсэн. Ийм зүйл болсонд үнэхээр их харамсаж байна. Уран бүтээлч хүн нийгэмд болж бүтэхгүй байгаа зүйлд банга сэтгэл нь зовниж түүнийгээ уран бүтээлээрээ олон нийтэд үзүүлдэг. Г.Бадамрагчаа бол тийм л уран бүтээлчдийн нэг” гэлээ.
Б.Чимэг
