Засгийн газрын ээлжит хуралдаан уржигдар боллоо. Улс орны эдийн засгийн энэ тэр гээд их юм сонгуулийн халуурал эрчээ авч байгаа энэ үед хүлээгээд хэрэггүй байдаг л даа. Богино зайн, сонгууль угтсан улс төр л хийдэг болохоор энэ үед гаргасан аливаа шийдвэр ихэвчлэн ходоодонд ороод хоол болохоос биш баялаг бүтээх тухай огтхон ч чиглэгддэггүй. Гэтэл уржигдрын Засгийн газрын хуралдаан мэргэшсэн парламентаас томилогдсон гүйцэтгэх засаглалынхны шийдвэр гэхэд ч ичмээр дамшиг болсон юм даг уу даа. Сангийн сайд Д.Хаянхярваагийн ярьж байгаагаас харвал шүү дээ. Сангийн сайд ярьж байна аа. “Оюутнууд Тавантолгойн хувьцаагаа авах боломжтой.

    Эрх нь нээлттэй. Манай намынхан ерөөсөө оюутнуудаасаа хавьцааг нь дээрэмдээгүй ш дээ. Харин эхлээд сургалтдаа төлсөн нэг сая төгрөгөө л буцаагаад бидэндээ өгчих” гэж ирээд л хурлынхаа танхимаас гарч ирээд сэтгүүлчдийн өмнө ярив даа. Ёстой нээрээ сэтгүүлчдийн бичээд байгаа гуйгаагүй байхад нь өгчихөөд мэдээгүй байхад нь дээрэмдсэнийхээ булхайг нуух гэсэндээ МАН-ынхан маань шавраасаа гараад намагт шигдчих шиг боллоо. Ер нь бол сүүлийн үед өрнөөд байгаа үйл явцыг хараад байхад эрх баригчид оюутнуудыг “Хүн биш ээ цэрэг байна” гэдэг нүдээр л хараад байгаа юм. “Эх орны чинь хишиг энэ шүү, хүү минь.
    Сайн сураарай” гээд 500 мянгыг хоёр жил өгчихөж байгаа юм. Эрх баригчдын авилга биш, эх орны хишиг юм чинь мэдээж хэн ч авна ш дээ. Ингэж эх орны хишиг тараагчийн дүрд тоглож байсан Засгийн газар зангаа гэнэт хувирган 116 дугаар тогтоол гээчээ дөрөвдүгээр сарын тэр нэгэн өдөр баталчихдаг байгаа. Энэ тогтоолоороо оюутнуудад ямар ч сонголт үлдээлгүйгээр сургалтын төлбөр хэлбэрээр хишиг хүртсэн оюутнуудад хувьцаа эзэмшүүлэхгүй гээд заачихаж байгаа юм. Уншигч та Засгийн газрын 116 дугаар тогтоолыг уншаад нэг үзээрэй. 1.3 дугаар зүйлдээ ахмад настан, хөгжлийн бэрхшээлтэй иргэдэд сонголт үлдээсэн атлаа оюутнуудад бол зүгээр л дунд хуруугаа гаргасан байгаа юм.
Гэтэл УБИС-ийн дөрөвдүгээр курсын оюутан Дөлөө жишээ нь эцэг эхийнхээ халааснаас 500 мянгаа гаргуулахгүй сургалтын төлбөртөө төлчихсөндөө тэрхэн үедээ өөрөөрөө бахархаж л байсан байх. Хэрэг дээрээ Засгийн газар, эрх баригчид нь Монгол хүн бүрийн өмчлөх эрхтэй Тавантолгойн хувьцааг нь хулгайлчихсан байсан байна шүү. Тогтоол гаргахынхаа өмнө ядаж саналыг нь асуудаг байгаа даа. Одоо болохоор нэг сая төгрөгөө буцаагаад төлчих, тэгээд хувьцаагаа ав гээд тал еэвэн барьсан

    Боролдойн дүрд тоглоод сууж байх жишээтэй. Тэгээд бас зургадугаар сарын 25-ны дотор нэг сая төгрөг төлөх хугацаат үүрэгтэй гэж байгаа. Жинхэнэ даажигнал. Эрх баригчдын ээлжит даажигнал энэ байлаа.
Дээрэмчин гэж бухимдсаны минь хариуд “Ченжүүд бол үнийн мэдээллийн хомсдолыг ашиглан бизнес эрхлэгчид” гэж валют арилжаалдаг ах хэлж байсныг санаж байна. Үнэний ортой байсан байж магадгүй. Харин одоо оюутнуудаас өөрсдийнх нь хувьцааг хулгайлж авчихаад улайм цайм буцаагаад зарна гээд сууж байгаа эрх баригчдыг юм гэж хэлэх ээ ч мэдэхгүй байна. Ийм баян орны 2.7-хон сая хүнийг ийм ядуу амьдруулна гэдэг мөн лут ухаан аа гэж уулга алдсан гаднын эрхмийн үгийг эрх баригчдад дайхаас өөр алга байна даа.

    Эрхэм эрх баригчид аа! Сонгууль дуустал дахин ямар “сюрприз” та бүхнээс хүлээх вэ? Ахмад настан, хөгжлийн бэрхшээлтэй иргэдэд өгнө гэсэн сая төгрөгийнхөө үлдэгдэл 670 мянган төгрөгөө сонгуулийн өмнө өгөхийн тулд цаасан мөнгө хэвлэх гэж байгаа гэсэн яриа нисч л байна лээ шүү. Дөрвөн жил эрх барих үндэсний мөнгөн тэмдэгтээ үнэгүйдүүлж, эдийн засгаа элгээр нь хэвтүүлэхээс ч эрхэм л юм байх даа! Ийм сюрприз л авахгүй шүү.